Ռուբեն Վարդազարյանի գործը դատարանում է․ հայտնի է՝ ով կքննի այն

Բարձրագույն դատական խորհրդի նախագահ (լիազորությունն այս պահին կասեցված են) Ռուբեն Վարդազարյանի գործը դատարանում է։ Այն մակագրվել է Երևան քաղաքի ընդհանուր իրավասության դատարանի դատավոր Մանվել Շահվերդյանին՝ դատարանի նախագահ Արթուր Մկրտչյանի կողմից։

Հիշեցնենք, որ արդեն երկու ամիս է, ինչ քրեական գործի շրջանակներում Ազգային անվտանգության ծառայությունը Սնանկության, Վերաքննիչ և Առաջին ատյանի դատարաններից առգրավվել է գործերն ավտոմատ մակագրող համակարգիչը։ Այս հանգամանքը տևական ժամանակ է բարձրաձայնվում է փաստաբանական համայնքի կողմից` որպես միջամտություն արդարադատության իրականացմանը։

Հիշեցնենք՝ ըստ մեղադրանքի՝ Ռուբեն Վարդազարյանը 2019թ. հուլիսի 19-ից զբաղեցնելով Բարձրագույն դատական խորհրդի նախագահի պաշտոնը, հանդիսանալով դատական իշխանության մարմնի ղեկավար աշխատող՝ բարձրաստիճան պաշտոնատար անձ, Սահմանադրությամբ և «Դատական օրենսգիրք» ՀՀ սահմանադրական օրենքով իրեն տրված լիազորությունների հետ չկապված գործողություններ կատարելով, պաշտոնեական դիրքը՝ պաշտոնից բխող հեղինակությունն օգտագործելով միջամտել է Լոռու մարզի ընդհանուր իրավասության դատարանի դատավոր Անդրանիկ Արամի Սիմոնյանի կողմից արդարադատության իրականացմանը:

Վարդազարյանին մեղադրանք է առաջադրվել Քրեական օրենսգրքի 332-րդ հոդվածի 3-րդ մասի՝ պաշտոնեական դիրքն օգտագործելով արդարադատության իրականացմանը խոչընդոտելու հատկանիշներով։ Որպես խափանման միջոց է կիրառվել ստորագրությունը՝ չհեռանալու մասին։

Ռոզա Վարդանյան