16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
3-օրից ՀԱՊԿ-ի նախագահությունը կանցնի Հայաստանին
Քաղաքականություն
13.09.2021 | 14:16
ՀԱՊԿ-ի խորհրդի նիստը տեղի կունենա Դուշանբեում սեպտեմբերի 16-ին՝ Տաջիկստանի նախագահ Էմոմալի Ռահմոնի նախագահությամբ։ Այս մասին լրագրողներին հայտնել է ՀԱՊԿ մամուլի քարտուղար Վլադիմիր Զայնետդինովը, գրում է ՏԱՍՍ գործակալությունը։
«Հավաքական անվտանգության խորհրդի անդամները կքննարկեն միջազգային ու տարածաշրջանային անվտանգության արդիական խնդիրներն ու ՀԱՊԿ-ի գործունեության հիմնական արդյունքները միջնստաշրջանային փուլում։ Ամենակարևոր հարցերից մեկը կլինի իրավիճակն Աֆղանստանում ու դրա ազդեցությունը ՀԱՊԿ անդամ պետությունների անվտանգության վրա»,- ասել է նա։
Զայնետդինովի խոսքով՝ նիստի ընթացքում ընդունվելու է Հավաքական անվտանգության խորհրդի հռչակագիրը, ինչպես նաև ստորագրվելու են մի շարք փաստաթղթեր, որոնք վերաբերում են խաղաղապահությանը, Հավաքական անվտանգության զորքերի գործունեության ապահովմանը, ՀԱՊԿ արագ արձագանքման ուժերի վերազինմանը ժամանակակից սպառազինությամբ, ռազմական ու հատուկ տեխնիկայով, հատուկ միջոցներով։
Բացի այդ, դիտարկվելու է կազմակերպության 2022 թ.-ի բյուջեն։
«Հաշվի առնելով 2021-2022 թթ.-ին ՀԱՊԿ-ի նախագահության Հայաստանի Հանրապետությանը փոխանցելը՝ ՀՀ վարչապետ Նիկոլ Փաշինյանը կներկայացնի երկրի առաջնահերթությունները, որոնք նախատեսվում են իրականացնել»,- ասել է մամուլի քարտուղարը։
Բացի այդ՝ Դուշանբեում անցկացվելու է արտաքին գործերի նախարարների խորհրդի նիստ, պաշտպանության նախարարների խորհրդի ու անվտանգության խորհրդի քարտուղարների խորհրդի նիստ, որոնց ընթացքում քննարկվելու է ռազմաքաղաքական իրադրությունը ՀԱՊԿ հավաքական անվտանգության տարածաշրջաններում։
Սպասվում է նաև, որ ընդունվելու են քաղաքական հայտարարություններ, այդ թվում՝ ՀԱՊԿ անդամ պետությունների համատեղ հայտարարությունը «Աֆղանստանում իրավիճակի մասին»։
Էմմա Չոբանյան
