04.05.2024 | 14:40
Աշխարհահռչակ ջութակահար Սերգեյ Խաչատրյանը համերգներ կունենա Երևանում և մարզերում
«Երեք եղբայր-2021». Բաքվում մեկնարկել են Ադրբեջանի, Թուրքիայի ու Պակիստանի մասնակցությամբ զորավարժությունները
Քաղաքականություն
13.09.2021 | 13:34
Բաքվում նախօրեին տեղի է ունեցել միջազգային «Երեք եղբայր-2021» զորավարժությունների բացման հանդիսավոր արարողությունը՝ Ադրբեջանի, Թուրքիայի ու Պակիստանի հատուկ նշանակության ջոկատների մասնակցությամբ. hաղորդում են ադրբեջանական լրատվամիջոցները՝ վկայակոչելով Ադրբեջանի պաշտպանության նախարարությանը։
Ադրբեջանի հատուկ նշանակության ուժերի հրամանատար, գեներալ-լեյտենանտ Հիքմեթ Միրզոևը նշել է, որ Ադրբեջանը, Թուրքիան ու Պակիստանը «անհիշելի ժամանակներից բարեկամական ու եղբայրական» երկրներ են։ Դրա վառ օրինակն էլ, ըստ Միրզոևի, Արցախյան 44-օրյա պատերազմի առաջին օրերից Թուրքիայի ու Պակիստանի՝ Ադրբեջանին ուղղված աջակցությունն է եղել։
«Տարածաշրջանի ու մեր ժողովուրդների անվտանգության ապահովման համար կյանքի են կոչվում կարևոր միջոցառումներ՝ ուղղված մեր կապերի հետագա ամրապնդմանն ու զարգացմանը»,- ասել է Միրզոևը։
Թուրքիայի ու Պակիստանի պատվիրակությունների ղեկավարներն էլ իրենց ելույթներում նշել են, որ այս զորավարժությունները կնպաստեն երեք երկրների բանակների հետագա համագործակցության ամրապնդմանը ՝ահաբեկչության դեմ պայքարում նոր մեթոդների բացահայտման ու փորձի փոխանակման ուղղությամբ։
Նշենք, որ «Երեք եղբայր 2021» միջազգային այս զորավարժությունները կտևեն մինչև սեպտեմբերի 20-ը։
Էմմա Չոբանյան
