16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
ԱՄՆ-ում 100-ից ավելի աշխատակից ունեցող ընկերությունների աշխատակիցները պարտավոր են պատվաստվել Covid 19-ի դեմ
Քաղաքականություն
10.09.2021 | 17:23
ԱՄՆ իշխանությունները կազմակերպություններին, որոնցում աշխատում է ավելի քան 100 մարդ, պարտավորեցրել են իրենց աշխատակիցներից պահանջել պատվաստվել նոր կորոնավիրուսի դեմ։
«Որպես նախագահ՝ իմ պարտավորությունն է պաշտպանել բոլոր ամերիկացիներին, այնպես որ ես այսօր կհայտարարեմ, որ Աշխատանքի նախարարությունը արտակարգ միջոցներ է մշակում, համաձայն որոնց՝ ավելի քան 100 աշխատակից ունեցող գործատուները պետք է ապահովեն, որպեսզի իրենց աշխատակիցներն ամբողջությամբ պատվաստվեն կամ բացասական թեստ ներկայացնեն շաբաթական առնվազն մեկ անգամ»,- ասել է ԱՄՆ նախագահ Ջո Բայդենը։
Բայդենի խոսքով՝ այս չափորոշիչի տակ ընկնող ընկերություններում աշխատում է ընդհանուր առմամբ ԱՄՆ ավելի քան 80 միլիոն ԱՄՆ բնակիչ։
«Խոշոր ընկերություններից շատերն արդեն ներկայացրել են նման պահանջ, մասնավորապես United Airlines, Disney, Tyson Foods և անգամ Fox News-ը։ Մենք պատրաստվում ենք պաշտպանել մեր պատվաստված աշխատակիցներին իրենց չպատվաստված գործընկերներից։ Մենք մտադիր ենք կրճատել կորոնավիրուսի տարածումը՝ բարձրացնելով ամերիկյան ընկերություններում աշխատակիցների պատվաստման տոկոսները»,- հավելել է ԱՄՆ նախագահը։
Բայդենը նաև հայտարարել է, որ առանց բացառության ԱՄՆ դաշնային կառավարության բոլոր պետական ծառայողները պարտադրված կլինեն պատվաստվել։ Նրա խոսքով՝ ինքը ստորագրել է կամ մոտ օրերս կստորագրի համապատասխան կատարողական հրամանները։
«Եթե ցանկանում եք աշխատել դաշնային կառավարության հետ, նրա հետ գործ ունենալ, պատվաստվեք ու պատվաստեք ձեր աշխատուժը»,- հավելել է նախագահը։
Համաճարակի դեմ պայքարի ԱՄՆ նախագահի նոր ծրագրով կկրկնապատկվեն հասարակական տրանսպորտում պաշտպանիչ դիմակներ կրելուց հրաժարվելու համար տուգանքները: Բայդենը նաև անընդունելի է համարել այն, որ Միացյալ Նահանգներում միջադեպերն աճում են, երբ ուղևորներն իրենց ագրեսիվ են պահում բորտուղեկցողների նկատմամբ, երբ վերջիններս պահանջում են դիմակներ կրել:
Վարչությունից պարզաբանել են, որ կանոնները խստացվում են սեպտեմբերի 10-ից։ Բոլոր նրանց համար, ովքեր կանոնները խախտում են առաջին անգամ՝ տուգանքը կկազմի 500-ից 1000 ԱՄՆ դոլար։ Կրկնակի խախտման դեպքում տուգանքը կավելան մինչև 3000 ԱՄՆ դոլարի։
Ինչպես պարզաբանել է Բայդենը, նոր ծրագիրը ենթադրում է նաև կորոնավիրուսով վարակման թեստերի ավելի ակտիվ իրականացում։ Նրա խոսքով՝ ԱՄՆ վարչակազմը միջոցներ է ձեռնարկել, որպեսզի խոշոր առևտրի կենտրոններում մոտ օրերս սկսեն վաճառել ոչ թանկ թեստեր, որոնք թույլ կտան տնային պայմաններում արագ իմանալ արդյունքները։ Երկրի բազմաթիվ դեղատներում, ինչպես նշել է ԱՄՆ նախագահը, թեստն անվճար կլինի։
Տաթև Ֆռանգյան
