07.11.2024 | 21:14
Կալիֆորնիայում տարհանում է սկսվել 5,6 հազար հա տարածքում բռնկված հրդեհի պատճառով
1800 հայցվոր, 300 փաստաբան և 500 հատոր․ մեկնարկում է Փարիզի ահաբեկչությունների գործով պատմական դատավարությունը
Քաղաքականություն
08.09.2021 | 13:29
Փարիզում մեկնարկում է 2015 թվականի նոյեմբերի 13-ին Ֆրանսիայի մայրաքաղաքում իրականացված ահաբեկչությունների գործով դատական նիստը: Հիշեցնենք՝ հարձակման զոհ էր դարձել 130 մարդ, վիրավորվել՝ ավելի քան 400-ը: Լսումներին, որոնք լուսաբանելու են տասնյակ լրագրողներ, կմասնակցեն մոտ 1800 քաղաքացիական անձ և ավելի քան 300 փաստաբան, հաղորդում է Euronews-ը:
Գործով անցնում է 20 մարդ: Դատարան է ներկայանալու 11 կալանավորված անձ, որոնց թվում է Սալահ Աբդեսլամը, որը, ըստ հետաքննության տվյալների, առանցքային դեր է խաղացել ահաբեկչությունների նախապատրաստման գործում: Տղամարդը 2016-ի մարտին ձերբակալվել էր Բելգիայում ու արտահանձնվել Ֆրանսիային:
Մյուս մեղադրյալը Մուհամեդ Աբրինին է, որը զբաղվել է ահաբեկիչների տեղափոխմամբ, զենքի մատակարարմամբ և հարձակումների ֆինանսավորմամբ: Աբրինին ոստիկանության ուշադրության կենտրոնում է հայտնվել այն բանից հետո, երբ նրան տեսել են Փարիզից հյուսիս գտնվող բենզալցակայանի տեսախցիկներից մեկի տեսագրած տեսանյութում:
Մեղադրյալներից երեքն ազատության մեջ են՝ ոստիկանության հսկողության ներքո: Փարիզում իրականացված հարձակումներին առնչվող ևս վեց մարդու նկատմամբ հետախուզում է հայտարարվել, սակայն ենթադրվում է, որ նրանցից շատերը սպանվել են Սիրիայում կամ Իրաքում:
Ահաբեկչությունների գործն ունի ավելի քան մեկ միլիոն էջ, որոնք հավաքված են հինգ հարյուր հատորում, ինչը զարմանալի չէ՝ հաշվի առնելով հարձակումների հետևանքով զոհվածների և վիրավորների թիվը: Դատավարությանը ելույթ կունենան բազմաթիվ վկաներ, այդ թվում՝ ահաբեկչությունից փրկվածներ: Լսումներին կմասնակցեն ուժային կառույցների անդամներ, արդարադատության ներկայացուցիչներ և քաղաքական գործիչներ, այդ թվում՝ Ֆրանսիայի նախկին նախագահ Ֆրանսուա Օլանդը, ՆԳ նախկին նախարար Բեռնար Կազնյովը և Փարիզի դատարանի նախկին դատախազ Ֆրանսուա Մոլենը:
Տաթև Ֆռանգյան
