Սիրիա վերադարձած փախստականները համակարգված կերպով կտտանքների, ստորացումների և սեռական բռնության են ենթարկվում ուժայինների կողմից․ Amnesty International

Սիրիա վերադարձած փախստականները համակարգված կերպով կտտանքների, ստորացումների և սեռական բռնության են ենթարկվում ուժայինների կողմից։ Այս մասին հայտնում են Amnesty International-ի իրավապաշտպանները։

Նշվում է, որ Ասադին հավատարիմ սիրիացի սահմանապահներն ու ոստիկանները փախստականներին ասում են, թե բոլոր նրանք, ովքեր հեռացել են երկրից պատերազմի ժամանակ, իրենց համար ահաբեկիչ են։

Amnesty International-ի կողմից հրապարակված զեկույցը հիմնված է երկիր վերադարձած ավելի քան 40 փախստականների ու նրանց հարազատների վկայությունների վրա։

Իրավապաշտպաններն ասում են, որ իրենք հավաստի կերպով փաստագրել են Ասադի անվտանգության ուժերի կողմից փախստականների իրավունքների կոպիտ խախտման 66 դեպք: Տուժածների թվում են 13 երեխա, 15 կին և 38 տղամարդ: Սիրիա վերադարձած 5 մարդ մահացել է անազատության մեջ, իսկ 17-ը համարվում է անհետ կորած:

Սրանք սպառիչ թվեր չեն. լրատվամիջոցներն ու հասարակական կազմակերպությունները վաղուց են հարցազրույցներ հրապարակում վերադարձածների հետ, որոնք պնդում են, որ ենթարկվել են բռնությունների սիրիական բանտերում: Սիրիայի անվտանգության ուժերը պատերազմից առաջ նույն դաժանությամբ են վերաբերվում բանտարկյալներին և կասկածյալներին, ասում են իրավապաշտպանները:

Մինչդեռ Ասադի կառավարությունը շարունակում է փախստականներին հորդորել վերադառնալ հայրենիք՝ Սիրիան վերակառուցելու համար:

«Հնարավոր է, որ ռազմական գործողությունները մարել են, սակայն Սիրիայի կառավարության հակվածությունը մարդու իրավունքների կոպիտ խախտումների նկատմամբ չի վերացել»,- հայտնում են իրավապաշտպանները:

Տաթև Ֆռանգյան