06.05.2024 | 23:11
Թուրքիայում մայիսի 1-ի ցույցերի համար դատարանը 38 մարդու է կալանավորել
Պուտինն աղետ է անվանել ամերիկյան զորքերի դուրսբերումից հետո Աֆղանստանում տիրող իրավիճակը
Քաղաքականություն
03.09.2021 | 18:44
ՌԴ նախագահ Վլադիմիր Պուտինն աղետ է անվանել ամերիկյան զորքերի դուրսբերումից հետո Աֆղանստանում տիրող իրավիճակը, գրում է ՏԱՍՍ-ը:
«Իսկապես, սա աղետ է: Սա ճիշտ է: Սրանք իմ խոսքերը չեն, ամերիկացի վերլուծաբանների խոսքերն են: Սա աղետ է, քանի որ ամերիկացիները, ովքեր շատ պրագմատիկ մարդիկ են, այս արշավի վրա ծախսել են ավելի քան 1,5 տրիլիոն դոլար, և ո՞րն է արդյունքը: Եվ եթե նայեք այն մարդկանց թվին, որոնք լքված են Աֆղանստանում, աշխատում էին հավաքական Արևմուտքի, Միացյալ Նահանգների և նրա դաշնակիցների համար, ապա սա հումանիտար աղետ է»,- հայտարարել է Պուտինը Արևելյան տնտեսական ֆորումի լիագումար նիստում ունեցած ելույթում։
Նա նշել է, որ խորհրդային զորքերն Աֆղանստանից հեռացել են կազմակերպված կերպով, և Քաբուլում մնացած ռեժիմը գոյատևել է ևս մի քանի տարի:
Պուտինն ընդգծել է, որ անհնար է ժողովրդավարությունը դրսից բռնի կերպով արմատավորել. եթե որևէ ժողովրդի դա անհրաժեշտ լինի, ինքը կհանգի դրան:
ՌԴ ղեկավարը նաև նշել է, որ Ռուսաստանը շահագրգռված չէ Աֆղանստանի քայքայմամբ՝ հավելելով, որ Ռուսաստանի Դաշնությունը պետք է ելնի այն իրողությունից, որ թալիբները վերահսկում են Աֆղանստանի գրեթե ամբողջ տարածքը:
Պուտինը շեշտել է՝ Աֆղանստանում իրավիճակը սպառնալիք է ՌԴ հարևանների և հենց ՌԴ-ի համար։
Տաթև Ֆռանգյան
