05.05.2024 | 21:52
7 ոսկի և 2 արծաթ. Հայաստանի հավաքականը ավարտեց ելույթները ուշուի ԵԱ-ում
Շուշիի գորգերի թանգարանը 10 տարեկան է․ որտեղ կհանգրվանեն թանգարանի 160 փրկված ցուցանմուշները. ՏԵՍԱՆՅՈՒԹ
Մշակույթ
02.09.2021 | 19:42
Շուշիի գորգերի թանգարանն արդեն տասը տարվա պատմություն ունի։ 2011 թվականի սեպտեմբերի 2-ին Շուշիում բացվեց իր տեսակի մեջ եզակի հնագույն և ժամանակակից գորգերի թանգարանը։ 2020 թվականի հոկտեմբերի վերջին Հայաստանի մշակույթի նախարարությունից նմուշները տարհանելու առաջարկ է եղել։ Արդյունքում գիշերով հեռախոսների լույսի տակ թանգարանային նմուշները դուրս են բերվել Շուշիից։ Թանգարանի ցուցանմուշների թվում հանդիպում են բավականին հազվագյուտ նմուշներ, որոնց տարիքը հարյուրամյակներով է հաշվվում․ ամենահինը 350 տարվա պատմություն ունի։
Շուշիից տեղափոխված գորգերն այժմ գտնվում են Ալեքսանդր Թամանյանի անվան ճարտարապետության ազգային թանգարան-ինստիտուտում․ այսօր լրացավ Շուշիի գորգերի թանգարանի 10-ամյակը, ինչի կապակցությամբ էլ թանգարան-ինստիտուտում ցուցադրություն էր կազմակերպվել։
Հավաքածուն Վարդան Ասծատրյանինն է, որը 20 տարվա ընթացքում գորգերը գնել է Արցախի տարբեր գյուղերից ու Եվրոպայում բնակվող արցախցիներից:
Շուշիի թանգարանի 300 ցուցանմուշից հնարավոր է եղել տեղափոխել միայն 160-ը: Ֆոնդերում պահված գորգերը, բրոնզե, քարե դարի խեցեղենն ու կենցաղային իրերը Շուշիում են մնացել:
Շուշիից տարհանված գորգերը Թամանյանի անվան ճարտարապետության ազգային թանգարան-ինստիտուտում երկար մնալ չեն կարող։ Թանգարանի տնօրեն Մարկ Գրիգորյանն ասում է՝ որքան հնարավոր է՝ պահում է։ Տարհանված գորգերի հանգրվանի հարցն այժմ անհայտ է, բայց Շուշիի գորգերի թանգարանի հիմնադիր Վարդան Ասծատրյանը լիահույս է, որ հարցը ժամանակի ընթացքում լուծում կստանա։
Մանրամասները՝ տեսանյութում։
Արփի Հակոբյան
