05.06.2026 | 10:49
Արման Սահակյանը երկու ամսով կալանավորվեց
1000 արցախցի աշակերտ ստացել է դպրոցական պայուսակ ու դպրոցական պարագաներ. «Ազնավուր» հիմնադրամ
Հասարակություն
01.09.2021 | 16:09
«Ազնավուր» հիմնադրամի և Դեսինի հայ մշակույթի տան միջև համագործակցության, ինչպես նաև Դեսին-Շաղպիոյի քաղաքապետարանի մասնակցության շնորհիվ Արցախի Մարտունու շրջանում ապրող 1000 աշակերտ ստացավ դպրոցական պայուսակներ և այլ պարագաներ. տեղեկացնում են «Ազնավուր» հիմնադրամից:
Այս նախաձեռնության շրջանակներում մենք կարողացանք ընդգրկել Ճարտարի համայնքի 4 և Մարտունու շրջանի 7 սահմանամերձ դպրոցներ: Բաշխումն իրականացվել է Մարտունու շրջանի կրթության վարչության միջոցով:
—-
Արցախյան վերջին պատերազմը հանգեցրեց հումանիտար իրական ճգնաժամի, ինչի հետևանքով տասնյակ հազարավոր ընտանիքներ տեղահանվեցին՝ կորցնելով տունն ու ողջ տնտեսությունը: Այս փախստականներից գրեթե 50.000-ը երեխաներ են: Հրադադարի ռեժիմի հաստատումից հետո շատերը որոշեցին վերադառնալ Արցախ և կյանքը սկսել նորովի:
44-օրյա պատերազմի ընթացքում ծանր հրետանու թիրախ դարձած դատարկ դպրոցները կրկին ողջունեցին իրենց աշակերտներին: Եվ ի հեճուկս հետպատերազմյան երկրի բազում մարտահրավերների և խոչընդոտների՝ ծնողներն ամեն ինչ արեցին իրենց երեխաներին կրթվելու հնարավորություն ընձեռելու համար:
«Ազնավուր» հիմնադրամը, Դեսինի հայ մշակույթի տան և Դեսին-Շաղպիոյի քաղաքապետարանի աջակցությամբ, իրականացրել է սոցիալ-կրթական նախագիծ Արցախի երեխաների համար` ապահովելով նրանց դպրոցական պարագաներով:
Ծրագիրը հնարավորություն է ընձեռել Արցախի սահմանամերձ շրջաններում ապրող 1000 երեխաների իրացնելու կրթություն ստանալու իրենց իրավունքը: Այս նախաձեռնությամբ մենք ցանկանում ենք մեր համերաշխությունը հայտնել արցախցի երեխաներին այս դժվարին իրավիճակում:
Յուրաքանչյուր աշակերտի համար նախատեսված փաթեթը ներառում է դպրոցական պայուսակ, տետրեր, գրիչներ և այլ գրենական պիտույքներ, որոնք կբավարարեն երեխաների կարիքները մեկ ուսումնական տարվա համար (2021-2022):
