07.11.2024 | 23:23
Թուրքիան Թրամփի նախագահության օրոք ԱՄՆ-ի կողմից մասքատուրքերի իջեցում է ակնկալում
Նավալնին բանտից խոսել է Պուտինին հաղթելու հնարավորության, կալանավայրում իր կյանքի և ՌԴ-ի դեմ պատժամիջոցների մասին․ NYT
Քաղաքականություն
26.08.2021 | 14:56
Ռուս ընդդիմադիր գործիչ Ալեքսեյ Նավալնին The New York Times-ին տված հարցազրույցում խոսել է այն մասին, թե ում նկատմամբ պետք է պատժամիջոցներ կիրառվեն, նկարագրել է իր կյանքը կալանավայրում և պատասխանել Պուտինին հաղթելու հնարավորության մասին հարցին:
Պատասխանելով Ռուսաստանի ներկայիս քաղաքական իրավիճակի մասին հարցին՝ Նավալնին ասել է. «Փաստորեն, «Հակախորհրդային քարոզչության և ագիտացիայի մասին» տխրահռչակ խորհրդային օրենքը վերածնվել է Ռուսաստանում: Հարյուրավոր կայքեր արգելափակված են՝ նույնիսկ առանց դատարանի ձևական որոշումների: Քաղբանտարկյալների թիվն աճում է»։
Նա, միաժամանակ, կոչ է արել արևմտյան երկրներին ոչ թե պատժամիջոցներ կիրառել Ռուսաստանի դեմ, այլ սահմանափակվել օլիգարխների դեմ պատժիչ միջոցներով:
«Շատ ավելի կոշտ պատժամիջոցներ, քան այժմ են գործում, պետք է կիրառվեն նրանց նկատմամբ, ովքեր թալանում են Ռուսաստանը, աղքատացնում ժողովրդին և զրկում նրանց ապագայից»,- ասել է Նավալնին՝ հիասթափեցնող որակելով այն փաստը, որ օլիգարխների դեմ պատժամիջոցներ դեռևս չեն կիրառվել:
«Դա հենց այդպես էլ պետք է կոչել՝ «Պատժամիջոցների փաթեթ ի պաշտպանություն ռուս ժողովրդի՝ ընդդեմ կոռուպցիայի, ստի և բռնակալության»»,- կարծում է Նավալնին:
Նա հայտնել է, որ իր առողջական վիճակը բարելավվել է շնորհիվ այն բանի, որ իր մոտ թողել են քաղաքացիական բժիշկների, ինչպես նաև դադարել են իրեն արթնացնել յուրաքանչյուր ժամը մեկ անգամ՝ որպես փախուստի հակված անձի ստուգելու համար։ Նա նաև նկարագրել է իր օրվա ընթացքը, որը սկսվում է առավոտյան ժամը 5-ին արթնանալով, առանձնահատուկ շեշտադրում է կատարել երեկոյան ժամը 6-ի օրակարգին։
«Մենք ֆիլմեր ենք դիտում Մեծ Հայրենական պատերազմի կամ այն մասին, թե ինչպես մեկ անգամ՝ 40 տարի առաջ, մեր մարզիկները ջախջախել են ամերիկացիներին ու կանադացիներին։ Ամեն օր երեկոյան ժամը 18-ին, և ինձ համար հատկապես հստակ է դառնում Պուտինի ռեժիմի գաղափարախոսության էությունը՝ ներկայի և ապագայի փոխարինումն անցյալով»,- ասել է Նավալնին։
Պատասխանելով հարցին, թե հնարավո՞ր է հաղթել Պուտինին, Ալեքսեյ Նավալնին հիշեցրել է Պետդումայի ընտրությունների նախաշեմին պատգամավորի թեկնածուների զանգվածային հեռացումը:
«Եթե մենք կարողանայինք մասնակցել ընտրություններին, ապա նույնիսկ առանց փողի և տեղեկատվական ռեսուրսների հիմա էլ կհաղթեինք Պուտինի «Միասնական Ռուսաստան» կուսակցությանը դաշնային և տարածաշրջանային ընտրություններում: Խոշոր քաղաքներում նույնիսկ մեծ ջանքեր գործադրելու կարիք չէր լինի»,- ասել է Նավալնին:
Ըստ նրա՝ անձամբ Պուտինին հաղթելը ևս դժվար չի․ «Մի՛ չափազանցրեք նրա ժողովրդականությունը, ավտորիտար երկրում հարցումների թվերը քիչ բան են նշանակում: Պուտինը քաղաքական գործիչ է, որը երբեք չի մասնակցել բանավեճի: Նա վախենում է անպատրաստ հարցերից»:
