Քաղաքականություն
22.08.2021 | 20:00
Մեծ Բրիտանիայի վարչապետ Բորիս Ջոնսոնը Թուրքիայի նախագահ Ռեջեփ Թայիփ Էրդողանի հետ քննարկել է Աֆղանստանում տիրող իրավիճակը, «ՌԻԱ Նովոստի»-ի փոխանցմամբ՝ հաղորդում է Ջոնսոնի գրասենյակը:
«Վարչապետը Թուրքիայի նախագահ Ռեջեփ Էրդողանի հետ քննարկել է Աֆղանստանի ճգնաժամը։ Նրանք քննարկել են իրավիճակի կայունացման և երկրում ու տարածաշրջանում աֆղանական ժողովրդին աջակցություն ցուցաբերելու գործում միջազգային հանրության համատեղ աշխատանքի կարևորությունը»,- ասված է հաղորդագրության մեջ:
Երկու երկրների ղեկավարները համակարծիք են, որ Աֆղանստանի ցանկացած նոր կառավարություն պետք է ներկայացնի Աֆղանստանի բնակչության բոլոր ներկայացուցիչների շահերը, ինչպես նաև պաշտպանի կանանց և փոքրամասնությունների իրավունքները, նշվում է հաղորդագրության մեջ:
«Նրանք պայմանավորվել են, որ երկրները պետք է կիսեն փախստականների օգնության և տեղավորման բեռը՝ նշելով, որ այդ գործընթացում կենտրոնական համակարգող դերը վերապահվում է ՄԱԿ-ին»,- ասված է հայտարարության մեջ:
Հիշեցնենք, որ Աֆղանստանից ԱՄՆ-ի զորքերի դուրսբերումից հետո «Թալիբան» շարժումը հարձակում էր սկսել կառավարական ուժերի վրա և մինչև օգոստոսի 15-ը մտել Քաբուլ՝ հայտարարելով իշխանության զավթման մասին: Աֆղանստանի նախագահ Աշրաֆ Գանին հեռացել է երկրից: Արևմտյան պետությունները տարհանում են իրենց քաղաքացիներին, այդ թվում ՝ դիվանագետներին։
