Էնթոնի Բլինքենը հիշեցրել է Չինաստանին ու Ռուսաստանին, որ ԱՄՆ-ն չափազանց ուժեղ երկիր է

ԱՄՆ Պետքարտուղար Էնթոնի Բլինքենը, ելույթ ունենալով Մերիլենդի համալսարանում, կոչ է արել ավելի շատ միջոցներ ներդնել ԱՄՆ ենթակառուցվածքների զարգացման մեջ։ Նրա խոսքով՝ սա անհրաժեշտ է երկրի զարգացման համար, որպեսզի աշխարհին ապացուցվի, որ ժողովրդավարությունը՝ լավագույն ճանապարհն է՝ չնայած Ռուսաստանի ու Չինաստանի այն պնդումներին, որ ԱՄՆ գտնվում է «անկման» փուլում։

«Չինաստանի և Ռուսաստանի իշխանությունները, ի թիվս այլ բաների, և՛ հրապարակային, և՛ մասնավոր կարգով ապացուցում են, որ Միացյալ Նահանգները անկում է ապրում, և ավելի լավ է ապագա կապել իրենց ավտորիտար կառավարման տեսլականի հետ, քան մեր ժողովրդավարականի հետ: Մենք կարող ենք և հիշեցնում ենք նրանց, որ դեռ չափազանց ուժեղ երկիր ենք», – ասել է նա Մերիլենդի համալսարանում:

«Մենք խոսում ենք, որ ժողովրդավարությունը լավագույն ճանապարհն է՝ ավտորիտարիզմի համեմատ։ Սակայն մի բան է այդ մասին խոսելը, այլ բան է գործնականում այն ապացուցելը»,- նշել է պետքարտուղարը։

Նա կարծում է, որ այդ փաստարկներին կարելի է դիմակայել, եթե երկրի ենթակառուցվածքներում  լուրջ ներդրումներ կատարվեն:
Բլինքենը նաև իր անհանգստությունն է հայտնել, որ դեռևս անցյալ դարավերջին Միացյալ Նահանգները առաջատար տեղ էր զբաղեցնում ենթակառուցվածքների ներդրման ոլորտում, սակայն այժմ, ինչպես նկատել է նա, իրավիճակը փոխվել է։

«Չինաստանն ամեն տարի երեք անգամ ավելի շատ է ծախսում ենթակառուցվածքներ վրա, քան ԱՄՆ-ը։ Ըստ դիվանագետի՝ ներդրումների բացակայությունը կարող է հանգեցնել այն բանին, որ ԱՄՆ կկորցնի իր մրցունակությունը։ Մասնավորապես առանց կրթության ու այլ ոլորտներում ներդրումների հնարավոր չի լինի ստեղծել բարձր վարձատրվող աշխատատեղեր ու արտերկրից ներդրումներ գրավել։

Տաթև Ֆռանգյան