19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Պետք է տանկերով գային Երևանի կենտրոն, ավտոմատներով կրակեի՞ն, դուք էլ նայեիք. Արփի Դավոյան․ ՏԵՍԱՆՅՈւԹ
Քաղաքականություն
10.08.2021 | 10:31
Ազգային ժողովի «Քաղաքացիական պայմանագիր» խմբակցության պատգամավոր Արփինե Դավոյանը Պաշտպանության և անվտանգության հարցերի մշտական հանձնաժողովին ուղղված քննադատությունները տեղին չի համարում:
Խորհրդարանում Պաշտպանության և անվտանգության հարցերի մշտական հանձնաժողովի նախագահի պաշտոնում Անդրանիկ Քոչարյանի թեկնածության հարցի քննարկման ժամանակ իր ելույթում Արփինե Դավոյանը նշեց, որ քննադատողների մեծ մասը տեղյակ չէ, թե Պաշտպանության և անվտանգության հանձնաժողովն ամբողջ կազմով և Անդրանիկ Քոչարյանի ղեկավարությամբ ինչ գործունեությամբ է զբաղվել անցած 2.5 տարվա ընթացքում:
Անդրադառնալով «Հայաստան» խմբակցության ղեկավար Սեյրան Օհանյանի երեկվա ելույթին՝ Դավոյանը նշեց. «Սեյրան Օհանյանը նշեց, որ պատերազմի ժամանակ քաոս և խառնաշփոթ էր ստեղծվել։ Պարո՛ն Օհանյան, այդ քաոսը ու խառնաշփոթը ստեղծված էր նաև որոշ մարդկանց ուղղորդված հրապարակումների շնորհիվ, դուք շատ լավ գիտեք, որովհետև դուք, որպես բանակին մոտ կանգնած մարդ, շատ լավ տեղյակ եք եղել, թե ներսում ինչ է կատարվել, դրսում ինչ է կատարվել։
Դուք անընդհատ ասում եք՝ ինքնաքննադատություն չկա։ Այս Խորհրդարանում և Կառավարությունում այնքան ինքնաքննադատություն կա իրականում, որ չի եղել երբեք Հայաստանի ոչ մի Կառավարությունում։ Մենք բազմաթիվ անգամ նշել ենք մեր սխալների մասին…
Շեշտում եք, որ չի կարելի ասել՝ փայլուն գնահատական ենք տալիս օրինակ՝ COVID-19-ի դեմ պայքարին, ասում եք, որ գնահատականները լինում են՝ վատ, լավ և բավարար։ Կուզեի, որ նման գնահատականներ տայիք այս պատերազմի ժամանակ իրենց մասնակցությունն ունեցած մարդկանց։ Կուզեի, որ ձեր սանդղակով գնահատական տայիք նաև մարտական գործողություններին մասնակցած ձեր որդուն։
Ասում եք, որ ԶՈՒ-երի ղեկավարության երիտասարդացրել ենք։ Վիգեն Սարգսյանին մենք չէինք նշանակել, դուք էիք նշանակել, ամենաերիտասարդ ՊՆ նախարարին։
Ուտելիքների մասին եք խոսում, բայց մեր գործընկերները փաստել են, թե բանակում ինչպիսի սնունդ է եղել»:
«Մեր գործընկերներից մեկը, երբ ԳՇ-ն հայտարարության մասին խոսք եղավ, ասաց՝ շնորհակալ պիտի լինեք ԳՇ ղեկավարությանը, որ հայտարարությամբ սահմանափակվեցին: Այսինքն՝ դա ի՞նչ է նշանակում, պետք է Մարտի 1-ի իրավիճակը ստեղծվե՞ր Երևանում, պետք է ավտոմատներով կրակեին ու տանկերով գային Երևանի կենտրո՞ն, գային կառավարաան շենքեր գրավեի՞ն, դուք էլ նայեիք ու ասեիք՝ լավ է, ամեն ինչ մեր պլաններով է գնում»,- հարցադրումներ արեց Արփի Դավոյանը։
Մանրամասները՝ տեսանյութում:
