26.04.2026 | 11:13
Վթարային ջրանջատում Երևանում
Բայդենը հոնգկոնգցիներին տալիս է ԱՄՆ-ում մնալու իրավունք
Քաղաքականություն
06.08.2021 | 22:14
ԱՄՆ-ի նախագահ Ջո Բայդենը հինգշաբթի օրը ստորագրել է մի հուշագիր, որը «18 ամսով ապահով ապաստան» է խոստանում Հոնգկոնգի հազարավոր բնակիչների, գրում է «Ամերիկայի ձայն»-ը։
Այսպիսով հոնգկոնգցիները արտաքսվելու փոխարեն ստանում են Միացյալ Նահանգներում մնալու իրավունք, որպեսզի խուսափեն Չինաստանի կողմից վերահսկվող այս տարածքում բռնաճնշումների ենթարկվելու հնարավորությունից:
Բայդենը դատապարտում է Հոնկոնգի ժողովրդավարության դեմ Պեկինի կողմից տասնչորս ամիս շարունակվող ճնշամիջոցները եւ հայտարարում, թե «հրամայական» է, որ ԱՄՆ-ի արտաքին հետաքրքրությունները Հոնգկոնգի բնակիչներին թույլ տան մնալ ու աշխատել ԱՄՆ-ում:
Սպիտակ տան մամլո քարտուղար Ջեն Փսաքին ասել է, թե Միացյալ Նահանգները խստորեն դեմ է Չինաստանի կողմից կիրառվող այսպես կոչված «Ազգային անվտանգության օրենքին», որը մերժում է հիմնարար իրավունքներն ու ազատությունները, վնասում Հոնգկոնգի ինքնավարությանը, ժողովրդավարական գործընթացներին ու հաստատություններին:
«Հաշվի առնելով քաղաքական դրդապատճառներով ձերբակալությունները և դատավարությունները, լրատվամիջոցներին լռեցնելու հանգամանքը և ընտրությունների ու ժողովրդավարական ընդդիմության տարածքի նվազումը, մենք կշարունակենք քայլեր ձեռնարկել ՝ ի պաշտպանություն Հոնկոնգի ժողովրդի», – ասել է Փսաքին:
Հոնգկոնգում Չինաստանի արտաքին գործերի նախարարության մասնաճյուղի հայտարարության մեջ էլ որպես պատասխան ասվում է, որ «այսպես կոչված անվտանգ ապաստան առաջարկելով», Բայդենը «ներգրավվում է այնպիսի գործողությունների մեջ, որոնք վերացնում են քաղաքի բարգավաճումն ու կայունությունը»:
Հրամանից օգտվելու հնարավորություն ունեցող մարդկանց ճշգրիտ թիվը դեռեւս պարզ չէ, սակայն Բայդենի վարչակազմի բարձրաստիճան մի պաշտոնյա ասել է, որ ԱՄՆ-ում բնակվող Հոնգկոնգի 330 հազար բնակիչների մեծ մասը հավանաբար ունեն այստեղ մնալու իրավունք, բացի նրանցից, ովքեր մեղադրվում են ծանր հանցագործությունների մեջ:
