11.10.2026 | 11:22
Երևանի 4 վարչական շրջաններում և Արարատի մարզի գյուղերում մինչև 36 ժամ ջուր չի լինի
Լիտվայի սահմանային անցակետերը լի են միգրանտներով
Քաղաքականություն
02.08.2021 | 22:28
Լիտվայի սահմանային անցակետերում ներկայումս 2 հազար միգրանտ է գտնվում, որոնք երկրի սահմանը հատել են Բելառուսից: Անօրինական միգրանտներին տեղակայելու համար Վիլնյուսը դիտարկում է ԵՄ անդամ մյուս երկրներին դիմելու հնարավորությունը: Այս մասին հայտարարել է երկրի սահմանային անվտանգության կառույցի ղեկավար Ռուստամաս Լյուբաեվասը, փոխանցում է Deutsche Welle-ի ռուսական ծառայությունը։
«Բոլոր սահմանային անցակետերը ներկայումս լի են միգրանտներով: Ստիպված ենք եղել նրանցով զբաղվել նույնիսկ շաբաթ և կիրակի օրերին։ Սակայն այս պահին նրանց տեղակայելու հարցում մենք հասել ենք մեր հնարավորությունների առավելագույնին»,- ասել է Լյուբաեվասը:
Կայքը նշում է, որ միգրանտների թիվն օրեցօր ավելանում է: Միայն օգոստոսի 2-ի առավոտյան սահմանն անօրինական հատել է 109 միգրանտ: 2021 թվականի սկզբից մինչև հիմա լիտվական սահմանը Բելառուսից անօրինական ձևով հատել է արդեն շուրջ 4 հազար միգրանտ: Այս ցուցանիշը մի քանի անգամ ավելին է, քան 2020 թվականին: Նշվում է նաև, որ Բելառուսի տարածքից լիտվական սահմանն անօրինական հատող քաղաքացիների շրջանում շատ են անձինք Իրաքից, Իրանից և Սիրիայից:
ՆԳՆ-ին առընթեր Պետական սահմանի պահպանության ծառայության պետի տեղակալ Վիդաս Մաչայտիսն էլ հայտնել է, որ սահմանի համապատասխան հատվածը՝ մոտ 508 կմ, պլանավորվում է փակել 4 մետրանոց պատով, որը պատված կլինի փշալարերով: Այս մասին գրում է ՏԱՍՍ-ն ու հավելում, որ Բելառուսի և Լիտվայի սահմանի ընդհանուր երկարությունը 680 կմ է:
