16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Հայ ժողովուրդը շրջադարձային սպասումներ ունի Ձեր քաղաքական ուժին վերապահված մանդատի երկրորդ շրջափուլից․ Արման Բաբաջանյանը շնորհավորել է Փաշինյանին
Քաղաքականություն
02.08.2021 | 19:37
«Հանուն Հանրապետության» կուսակցության ղեկավար մարմնի ներկայացուցիչ Արման Բաբաջանյանը շնորհավորական ուղերձ է հղել նորընտիր վարչապետ Նիկոլ Փաշինյանին։ Նրա ուղերձը ներկայացնում ենք ստորև․
«Նիկոլ Փաշինյան
Հայաստանի Հանրապետության վարչապետ
Մեծահարգ պարոն վարչապետ,
Հանուն Հանրապետության կուսակցության անունից շնորհավորում եմ Ձեզ Հունիսի 20-ին կայացած արտահերթ խորհրդարանական ընտրությունների արդյունքում Հայաստանի Հանրապետության վարչապետի պաշտոնում նշանակվելու առթիվ։
Մեր երկիրը, համայն հայ ժողովուրդը շրջադարձային սպասումներ ունի Ձեր քաղաքական ուժին վերապահված մանդատի երկրորդ շրջափուլից։ Սահմանների շուրջ ստեղծված իրավիճակը, անվտանգային մարտահրավերները, Արցախի կարգավիճակը, արտաքին քաղաքական հիմնահարցերը, բանակի առողջացումն ու արդիականացումը, երկրի սոցիալ-տնտեսական հիմնախնդիրները, քաղաքական միջավայրի վերբեռնումը, դատական և իրավապահ համակարգերի զտումը, առողջապահական, կրթական, մշակութային, գիտական, Հայաստան-սփյուռք հարաբերությունների հիմնավոր վերանորոգումը, ինչպես նաև այլ՝ մեր երկրի կենսագործունեության համար կարևորագույն հիմնահարցերին վերաբերող խնդիրների լուծումը կախված են Ձեր գլխավորած կառավարության որոշումներից։
Պարոն վարչապետ,
Հանուն Հանրապետության կուսակցությունը ժողովրդի իշխանության, մեր երկրի ինքնիշխանության և պետականության պաշտպանության իր առաքելության մեջ մնում է անզիջում և այդու պատրաստ է մեր անմնացորդ ներդրումն ու հետևողական մասնակցությունն ունենալ մեր երկրի շենացման և հզորացման գործում։
Արման Բաբաջանյան
Հանուն Հանրապետության կուսակցության
Ղեկավար Մարմնի ներկայացուցիչ»։
