14.11.2024 | 23:29
ՀՀ էկոնոմիկայի փոխնախարարի գլխավորած պատվիրակությունն այցելել է Չաբահար նավահանգիստ
Գանձա գյուղում տեղի է ունեցել Վահան Տերյանի տուն-թանգարանի ցուցասրահի բացումը
Մշակույթ
02.08.2021 | 18:03
Օգոստոսի 1-ին Գանձա գյուղում տեղի է ունեցել նշանավոր հայ բանաստեղծ, քնարերգու և հասարակական-քաղաքական գործիչ Վահան Տերյանի տուն-թանգարանի ցուցասրահի բացումը:
2020-2021 թվականներին Վահան Տերյանի տուն-թանգարանի վերականգնման աշխատանքները նախաձեռնել և իրականացրել է «Ջավախքին աջակցություն» հիմնադրամը:
Բացման արարողությանը ներկա էին ՀՀ ԿԳՄՍ նախարարի տեղակալ Արա Խզմալյանը, «Ջավախքին աջակցություն» հիմնադրամի հոգաբարձուների խորհրդի նախագահ Սոս Սահակյանը, տեղական ինքնակառավարման մարմինների ղեկավարներ, համայնքի բնակիչներ, Երևանից ժամանած հյուրեր, որոնց թվում՝ նաև Հովհաննես Թումանյանի թանգարանի ու Ե. Չարենցի անվան գրականության և արվեստի թանգարանի տնօրենները:
Բացման արարողության ելույթում ՀՀ ԿԳՄՍ նախարարի տեղակալ Արա Խզմալյանը նշել է, որ չափազանց կարևոր է կրտսեր սերնդին՝ պատանիներին, երիտասարդներին Տերյանի ստեղծագործությունները ներկայացնել արդիական եղանակներով, քանի որ մշակույթի մասին պետք է խոսել հետաքրքիր և ներկայացնել գրավիչ լուծումներով:
«Մեր խնդիրն է այս գեղեցիկ միջավայրը, որը համալրվելու և գործելու է արդիական մեթոդներով, լցվի նոր բովանդակությամբ: Եվ մենք առաջիկայում պետք է ուշադրություն դարձնենք ձևավորված այդ միջավայրերում մշակութային կրթական ծրագրերի իրականացմանը: Արդեն ՋԱՀ-ի և համայնքի ղեկավարների հետ քննարկել ենք տարաբնույթ ծրագրեր, մասնավորապես՝ հայ-վրացական համագործակցության ձևաչափով. դրանք կարող են լինել ինչպես մանկապատանեկան նախագծեր, այնպես էլ երաժշտական համատեղ ելույթներ, որոնք մեծապես պայմանավորված են համավարակի թելադրած պայմաններով»,- նշել է նախարարի տեղակալը և հավելել, որ առաջին իսկ հնարավորության դեպքում կիրականացվեն նախանշված ծրագրերը:
Անդրադառնալով նախարարության աջակցությամբ արդեն իսկ իրականացվող ծրագրերին՝ Արա Խզմալյանը տեղեկացրել է, որ երկրորդ տարին է, ինչ «Ջավախքին աջակցություն» հիմնադրամը դիմում է ԿԳՄՍ նախարարության դրամաշնորհային ծրագրերին և ստանում այն: Այս տարի դրամաշնորհային ծրագրի շրջանակում փառատոնի ձևաչափով կկազմակերպվի լուսանկարիչների այց դեպի Ջավախք:
Խոսելով Տերյանի տոհմական տան՝ հուշային կոթողի մասին՝ Արա Խզմալյանը հույս է հայտնել, որ առաջիկայում համատեղ ջանքերով հնարավոր կլինի ամրակայել և հիմնանորոգել այն:
«Կառույցը մեծ է և աշխատատար, այն ենթադրում է լուրջ ֆինանսական ներդրումներ: Մեր մասնակցությունն անշուշտ կլինի նաև փորձագիտական մակարդակում, որովհետև աշխատանքները պետք է սկսվեն ամենաբարձր փորձագիտական եզրակացության հիման վրա: Կարծում եմ, որ այդ կառույցի հիմնանորոգման արդյունքում կունենանք մի միջավայր, որը լայն հնարավորություններ կստեղծի մշակութային և կրթական տարբեր միջոցառումների իրականացման համար, այն կդառնա նաև լայն ցուցադրական տարածք և ուշագրավ զբոսաշրջային միջավայր»,- եզրափակել է ԿԳՄՍ նախարարի տեղակալը:
Հիշեցնենք, որ Վահան Տերյանի տուն-թանգարանը գործում է 1957 թվականից, թանգարանի համալիրի մեջ են մտնում Սուրբ Կարապետ եկեղեցին, որը 1852 թվականին կառուցել է Տերյանի պապը՝ տեր Գրիգորը:
