15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
Իրանի ԱԳՆ-ն անհիմն է անվանել ԱՄՆ-ի և Մեծ Բրիտանիայի մեղադրանքները լցանավի վրա հարձակմանը մասնակցության վերաբերյալ
Քաղաքականություն
02.08.2021 | 17:09
Թեհրանին ուղղված ԱՄՆ-ի և Մեծ Բրիտանիայի մեղադրանքները՝ ճապոնական Mercer Street լցանավի վրա հարձակմանը մասնակցության վերաբերյալ, անհիմն են և քաղաքական բնույթ են կրում։ Այս մասին հայտարարել է Իրանի ԱԳՆ պաշտոնական ներկայացուցիչ Սայիդ Խաթիբզադեն, գրում է ՏԱՍՍ-ը։
«ԱԳՆ ներկայացուցիչն ափսոսանք է հայտնել Մեծ Բրիտանիայի ԱԳՆ-ի մեղադրանքների կապակցությամբ՝ ուղղված Թեհրանին, որոնք այնուհետ կրկնել է ԱՄՆ պետքարտուղարը»,- ասվում է Իրանի ԱԳՆ հաղորդագրության մեջ։
Խաթիբզադեն նշել է, որ մեղադրանքները ներկայացվում են առանց որևէ ապացույցների։ Նրա խոսքով՝ «նշյալ երկրները լռություն են պահպանում, երբ ահաբեկչական ակցիաներ են տեղի ունենում Կարմիր ծովում և միջազգային ջրերում Իրանի առևտրային նավերի վրա, բայց, միևնույն ժամանակ, ակնհայտ քաղաքական կողմնակալությամբ անհիմն մեղադրանքներ են հնչեցնում Իրանի դեմ»:
Միաժամանակ, Իրանի դեսպանը կանչվել է Ռումինիայի ԱԳՆ՝ լցանավի վրա հարձակման կապակցությամբ, որի հետևանքով սպանվել են Ռումինիայի և Մեծ Բրիտանիայի քաղաքացիներ։
«Ռումինիան խստորեն պնդում է, որ անընդունելի է անօդաչուի օգտագործմամբ Mercer Street նավի վրա հարձակումը, որը հանգեցրել է նավի հրամանատարի՝ Ռումինիայի քաղաքացու մահվանը»,- ասվում է ԱԳՆ հայտարարության մեջ։
Նշվում է նաև, որ հաշվի առնելով Ռումինիայի միջազգային գործընկերների ներկայացրած տեղեկությունն այն մասին, որ հարձակումը կանխամտածված բնույթ է կրել և համաձայնեցվել Իրանի հետ, Ռումինիան անհապաղ բացատրություն է պահանջել Իրանի իշխանություններից և «իրեն իրավունք է վերապահում գործել համապատասխան կերպով՝ իր միջազգային գործընկերների հետ համարժեք պատասխան տալու համար»։
Ռումինիայի ԱԳՆ հայտարարությունում նաև ասվում է, որ քաղաքացիական թիրախի վրա հարձակումն արդարացում չունի և պետք է խստորեն դատապարտվի միջազգային մակարդակով։
Էմմա Չոբանյան
