Աֆղանստանում ռեկորդային թվով զոհեր կան խաղաղ բնակչության շրջանում․ ՄԱԿ-ի զեկույցը

Աֆղանստանում բռնության աննախադեպ աճ է գրանցվել միջազգային կոալիցիոն զորքերի դուրսբերումից հետո։ ՄԱԿ-ի հրապարակած զեկույցում ասվում է, որ սպանվածների և վիրավորների շուրջ կեսը կանայք ու երեխաներ են։ Այս մասին գրում է DW-ի ռուսական ծառայությունը։

Ըստ ՄԱԿ-ի՝ Աֆղանստանում խաղաղ բնակչության շրջանում կորուստները 2021 թվականի առաջին կիսամյակում հասել են ռեկորդային մակարդակի։ Զոհերի ու վիրավորների թիվը կտրուկ աճել է հատկապես մայիսից, երբ միջազգային զորքերը սկսեցին դուրս գալ երկրից, իսկ մարտական գործողությունները սկսեցին ակտիվանալ «Թալիբան» շարժման հարձակումների հետևանքով։

ՄԱԿ-ը նաև զգուշացնում է, որ իրավիճակը կարող է վատթարանալ։ Առանց «բռնության նշանակալի ապաէսկալացիայի»՝ Աֆղանստանում իրավիճակը կհանգեցնի նրան, որ 2021 թվականին «մեկ տարվա ընթացքում քաղաքացիական բնակչության շրջանում ամենամեծ թվով զոհերը կգրանցվեն»։

ՄԱԿ-ի տվյալներով՝ 2021 թվականի առաջին վեց ամիսների ընթացքում Աֆղանստանում 1․659 խաղաղ բնակիչ է զոհվել, 3․524-ը՝ վիրավորում ստացել։ Սա 47 տոկոսով ավելին է 2020թ․ նույն ժամանակահատվածի ցուցանիշից։ Մայիս-հունիս ամիսներին այս երկրում 783 մարդ է սպանվել, 1․609-ը՝ վիրավորվել։

Զեկույցում ցնցում է հատկապես այն փաստը, որ զոհերի գրեթե կեսը կանայք ու երեխաներ են․ 6 ամսվա ընթացքում սպանվել է 468 երեխա ու 219 կին, վիրավորվել՝ 1214 երեխա ու 508 կին։

Ի դեպ, Աֆղանստանի իշխանությունները հերքել են ՄԱԿ-ի զեկույցի տվյալները։ Աֆղանստանի բանակի ներկայացուցիչը հայտարարել է, որ ԶՈՒ-ն լքել է երկրի մի շարք շրջաններ՝ խաղաղ բնակչության շրջանում զոհերից խուսափելու համար։