Քաղաքականություն
20.07.2021 | 21:50
Ռուսաստանի և Ադրբեջանի տնտեսական հարաբերությունները վերականգնվում են համավարակից հետո, իսկ մոտակա ժամանակներում Բաքու կայցելի ներկայացուցչական ռուսական պատվիրակություն՝ առևտրատնտեսական համագործակցության քննարկման համար։ Այս մասին հայտարարել է ՌԴ նախագահ Վլադիմիր Պուտինը ադրբեջանցի գործընկերոջ՝ Իլհամ Ալիևի հետ Մոսկվայում տեղի ունեցած հանդիպմանը, գրում է ՌԻԱ Նովոստին։
«Երախտապարտ եմ, որ համաձայնեցիք գալ, փառք Աստծո՝ մեր հարաբերությունները վերականգնվում են կորոնավիրուսից հետո, նկատի ունեմ առաջին հերթին տնտեսությունը։ Անցյալ տարի որոշակի անկում կար, հիմա կայուն աճ, վերականգնում»,- ասել է Պուտինը։
Նա նաև նշել է, որ ակտիվորեն աշխատում է ՌԴ-ի և Ադրբեջանի միջև տնտեսական համագործակցության միջկառավարական հանձնաժողովը։
«Մոտ ժամանակներս նախատեսում ենք ձեզ մոտ ուղարկել մեր ներկայացուցչական պատվիրակությունը, որը կզբաղվի այդ հարցերով՝ արդեն Բաքվում»,- ասել է ՌԴ նախագահը։
Նրա խոսքով՝ նախատեսվում է համագործակցություն տարբեր ուղղություններով` արդյունաբերություն, տրանսպորտ, ենթակառուցվածքներ և այլն։
Էմմա Չոբանյան
