17.09.2026 | 14:10
ՄԻԵԴ-ն ընդդեմ Հայաստանի վճիռ է կայացրել մահացած զինծառայողի գործով
Ադամ Շիֆը ներկա է եղել հայ-ամերիկյան թանգարանի ու մշակութային կենտրոնի հիմնարկեքի արարողությանը
Քաղաքականություն
13.07.2021 | 12:20
ԱՄՆ կոնգրեսական Ադամ Շիֆը Գլենդելում ներկա է գտնվել Քալիֆորնիայի հայ-ամերիկյան թանգարանի ու մշակութային կենտրոնի հիմնարկեքի արարողությանը։ Այս մասին կոնգրեսականը հայտնել է Facebook սոցցանցի իր էջում։
«Պատիվ էր ներկա գտնվել Գլենդելի գեղեցիկ սրտում Քալիֆորնիայի հայ-ամերիկյան թանգարանի և մշակութային կենտրոնի հիմնարկեքի արարողությանը: Ամերիկահայերը մեր ազգի կարևոր բաղադրիչն են՝ հարստացնելով մեր սովորույթները, ավանդույթները և համայնքները: Նրանց պատմությունը ԱՄՆ պատմությունն է, հույսի պատմություն՝ դժվարությունների, համառության և նոր սկզբի առաջ: Այս թանգարանը կապահովի, որպեսզի այդ պատմությունը փոխանցվի սերնդեսերունդ»,- գրել է Ադամ Շիֆը։
Հիշեցնենք՝ Գլենդելում Հայոց պատմությանն ու հայկական մշակույթին նվիրված թանգարանի շինարարությունը մեկնարկել է հուլիսի 11-ին: Ավելի քան յոթ տարի տևած նախապատրաստական աշխատանքներից հետո հայ-ամերիկյան թանգարանի երկհարկանի ժամանակակից կառույցը վեր կխոյանա Գլենդելի Կենտրոնական զբոսայգում: Զբոսայգու արդիականացման վրա կծախսվի 18.5 մլն դոլար:
Նախագծի հեղինակը Գլենդելի Alajajian Marcoosi Architects ճարտարապետական ընկերությունն է: Նշվում է, որ կառույցի՝ ժայռ հիշեցնող ժամանակակից արտաքին տեսքը համահունչ է քարքարոտ Հայաստանին:
Տաթև Ֆռանգյան
