16.12.2025 | 17:07
Ադրբեջանի նախկին փոխվարչապետի նկատմամբ հետախուզում է հայտարարվել հեղաշրջման գործով
Դոնալդ Թրամփը դատական հայցեր է ներկայացնում սոցցանցերի դեմ
Քաղաքականություն
08.07.2021 | 22:58
ԱՄՆ նախկին նախագահ Դոնալդ Թրամփը չորեքշաբթի դատական հայց է ներկայացրել ընդդեմ Twitter-ի, Facebook-ի եւ Google-ի: Գործերն ուղղված են նաեւ ընդդեմ այդ ընկերությունների գործադիր տնօրենների, որոնց Թրամփը մեղադրում է պահպանողական տեսակետները լռեցնելու անօրինական գործողությունների մեջ, հաղորդում է Ամերիկայի Ձայնը։
Մայամիի մարզային դատարան ներկայացված բողոքում ասված է, որ Կալիֆորնիայից գործող սոցիալական այս ցանցերը ոտնահարում են ԱՄՆ-ի սահամանադրությամբ ազատ արտահայտվելու իրավունքը:
«Մենք ամերիկյան ազատությունների հարցում գրանցելու ենք պատմական հաղթանակ»,- հայտարարել է Թրամփը Նյու Ջերսիում անցկացված մամլո ասուլիսի ժամանակ:
Այս առնչությամբ նշված ցանցերի պատասխանատուները դեռեւս հանդես չեն եկել որեւէ հայտարարությամբ:
Հիշեցնենք, որ Թրամփը սոցիալական այս ցանցերում իր հաշվեհամարներից զրկվեց, երբ այս ընկերությունները հայտարարեցին, որ նա ոտնահարում է բռնություններ հրահրելու դեմ իրենց ընկերությունների քաղաքականությունը:
Թրամփը բողոքում է, որ Հաղորդակցության պարկեշտության մասին օրենքի 230-րդ կետը ինտերնետային խոշոր ընկերություններին չափից ավելի մեծ իրավունքներ է տալիս եւ ազատում է նրանց իրենց գործողությունների համար պատասխանատվությունից:
Ֆլորիդայում դաշնային մի դատավոր էլ անցյալ շաբաթ արգելափակել էր նահանգային այն օրենքի կիրառումը, որը նախատեսում էր նահանգին տուգանել սոցիալական այն ցանցերին, որոնք արգելքներ են հարուցում քաղաքական թեկնածուների նկատմամբ: Դատավորի կայացրած որոշման մեջ ասված է, որ Ֆլորիդա նահանգի կառավարիչ Ռոն ԴեՍանթիսի կողմից ստորագրված օրենքի նախագիծը հակասահմանադրական է:
