16.02.2026 | 12:43
Ինչպես կընտրվի բանկը կանխիկ եղանակով կենսաթոշակ ու նպաստ ստացողների համար․ ՏԵՍԱՆՅՈՒԹ
Թուրքիան իրեն օտարված է զգում եվրատլանտյան համայնքի կողմից․ Անկարան դժվարին ընտրության առաջ է ՆԱՏՕ-ի գագաթնաժողովից հետո
Քաղաքականություն
05.07.2021 | 21:18
Թուրքիան դժվարին ընտրության առաջ է կանգնած անցյալ ամիս տեղի ունեցած ՆԱՏՕ-ի գագաթնաժողովից հետո՝ դաշինքի հետ խնդրահարույց հարաբերությունների և տարածաշրջանային կապերի պատճառով։ Այս մասին ասել է Թուրքիայի նախկին ԱԳ նախարար Յաշար Յաքըշը, գրում է «Ահվալ» գործակալությունը։
«Թուրքիան իրեն օտարված է զգում եվրատլանտյան համայնքի կողմից, բայց այն գտնվում է նոր Մերձավոր Արևելքի ստեղծման առաջնագծում։ Բնականաբար, կա գայթակղություն՝ այս գործընթացում իր դերը խաղալու»,- ասել է Յաքըշը։
Թուրքիայի հարաբերությունները ՆԱՏՕ-ի հետ վատթարացել են վերջին 5 տարիների ընթացքում։
Թուրքիայի նախագահ Ռեջեփ Թայիփ Էրդողանը Բրյուսելում հունիսի 14-ին կայացած ՆԱՏՕ-ի գագաթնաժողովի շրջանակում մի շարք երկկողմ հանդիպումներ է ունեցել, այդ թվում՝ ԱՄՆ նախագահ Ջո Բայդենի հետ՝ քննարկելու հարաբերություններում առկա լարվածությունը։ Էրդողանը Բայդենի հետ հանդիպումը բնութագրեց «շատ օգտակար ու անկեղծ»՝ նշելով, որ զգում է՝ իր ամերիացի գործընկերը Թուրքիայի հետ «արդյունավետ գործընկերություն» է ցանկանում։
Յաքըշը նաև ասել է, որ Թուրքիան կարող է Ռուսաստանի հետ հայտնվել հակառակ դիրքերում, եթե լարվածությունը Սև ծովում աճի ուկրաինական և Ղրիմի ճգնաժամերի պատճառով։ Բացի այդ, ըստ նրա՝ Հարավային Կովկասում ևս դեռ իրավիճակը կայուն չէ․ Թուրքիան ցանկանում է ավելի ակտիվ մասնակցել հայ-ադրբեջանական հարաբերությունների կարգավորմանը, բայց «Ռուսաստանը նախընտրում է մնալ բացառիկ խաղացող»։
Թուրք նախկին պաշտոնյան նաև նշել է, որ Թուրքիան ավելի է ներքաշվելու Աֆղանստանի ճգնաժամում, եթե համաձայնի պահպանել Քաբուլի օդանավակայանի անվտանգությունը։ Սրա հետ մեկտեղ, նրա կարծիքով՝ Անկարան չի կարողանալու դուրս գալ Սիրիայի, Լիբիայի, Իրաքի հակամարտություններից։
«Անկարան այս խառնաշփոթում կարո՞ղ է իր դերը խաղալ։ Դա ավելի հեշտ կլիներ, եթե Թուրքիան լիներ 15 տարի առաջվանը, հիմա ավելի դժվար է»,- նշել է Յաշար Յաքըշը։
Էմմա Չոբանյան
