24.08.2026 | 20:16
ԿԲ-ն նոր կարգավորում է սահմանել․ բանկերից տեղեկանք ստանալը կդառնա անվճար
Կալիֆորնիաբնակ 4 հայեր սխեմա են ստեղծել և COVID-19-ի հետևանքների մեղմացման համար հատկացվող վարկերից ավելի քան 18 միլիոն դոլար ստացել
Քաղաքականություն
05.07.2021 | 13:56
Լոս Անջելեսի Էնսինո թաղամասի հայազգի բնակիչները՝ 42-ամյա Ռիչարդ Այվազյանը, նրա 37-ամյա կինն ու մի քանի ազգականներ մեղավոր են ճանաչվել COVID-19-ի հետևանքների մեղմացման համար հատկացվող վարկերից ավելի քան 18 միլիոն ԱՄՆ դոլար ստանալու սխեմա ստեղծելու մեջ։ Այս մասին հայտնում է ԱՄՆ Արդարադատության նախարարությունը։
ԱՄՆ դաշնային դատարանի երդվյալ ատենակալները 42-ամյա Ռիչարդ Այվազյանին, նրա կնոջը՝ Մարիետա Տեր-Աբելյանին, եղբորը՝ 41-ամյա Արթուր Այվազյանին և Գլենդելից 41-ամյա Վահե Դադյանին մեղավոր են ճանաչել բանկային խարդախությունների, համացանցային խարդախությունների և փողերի լվացման մեջ: Արթուր Այվազյանը մեղավոր է ճանաչվել նաև ծանրացուցիչ հանգամանքներում անձնական տվյալներ գողանալու մեջ:
Ըստ դատախազության՝ 4 ամերիկաբնակ հայերը ներկայացել են կեղծ անուններով, ինչպես օրինակ «Յուլյա Ժադկո» և «Վիկտորիա Կաուիչկո», որպեսզի հայտ ներկայացնեն՝ կորոնավիրուսի բացասական ազդեցությունը մեղմելու համար նախատեսված տնտեսական աջակցության ծրագրերից օգտվելու համար: Տեղեկացվում է, որ հայտերում հաճախ օգտագործվել են կեղծ փաստաթղթեր, ինքնություններ, հարկային փաստաթղթեր ու վճարային տեղեկություններ:
Դաշնային իշխանությունները հայտնում են, որ COVID-ի հետևանքների չեզոքացման համար նախատեսված օգնության ֆոնդերից խարդախությամբ ստացած ավելի քան 18 միլիոն դոլարով ամբաստանյալները վճարումներ են կատարել Տարզանայում, Գլենդելում և Փոլմ Դեզերթում շքեղ տներ, ոսկեղեն, ադամանդներ, թանկարժեք ժամացույցներ, կահույք, դիզայներական պայուսակներ, հագուստ և այլն գնելու համար։
«Փնտրելով արագ հարստանալու ճանապարհ՝ ամբաստանյալները գողացել են դաշնային միջոցները, որոնք նախատեսված էին COVID-19 համաճարակից տուժած ամերիկացիների և դրա հետևանքով առաջացած տնտեսական հետևանքների չեզոքացման համար»,- հայտարարել է դատախազ Թրեյսի Ուիլքինսոնը:
Ամերիկաբնակ հայերին սպառնում է տասնամյակների ազատազրկում: Դատարանը վճիռը կհրապարակի սեպտեմբերի 13-ին:
Դատախազները հայտնել են, որ այս գործով անցնող ևս 4 անձ արդեն ընդունել է մեղքը: Այդ անձանց թվում է Էնսինոյի 39-ամյա բնակիչ Թամարա Դադյանը, որը Այվազյան եղբայրներից Արթուրի կինն է և Վահե Դադյանի զարմուհին: Դադյանն ընդունել է մեղքը բանկային խարդախության և կապի էլեկտրոնային միջոցներով կատարված խարդախության, ծանրացուցիչ հանգամանքներում անձնական տվյալներ գողանալու և նախնական համաձայնությամբ փող լվանալու մեջ: Կնոջը սպառնում է մինչև 52 տարվա ազատազրկում: Վճիռը կհրապարակվի սեպտեմբերի 27-ին:
Տաթև Ֆռանգյան
