27.11.2024 | 20:33
ՊՆ խոսնակը` Ջերմուկի դիրքերից ՀՀ ԶՈւ ստորաբաժանումների հեռանալու լուրերի մասին
Անտոնիո Գուտերեշը վերընտրվել է ՄԱԿ-ի գլխավոր քարտուղարի պաշտոնում․ նա խոսել է նախորդ ժամկետի գլխավոր դասի մասին
Քաղաքականություն
18.06.2021 | 22:11
ՄԱԿ-ի Գլխավոր ասամբլեան այսօր Անտոնիո Գուտերեշին վերընտրել է կազմակերպության գլխավոր քարտուղարի պաշտոնում։ Այս տարի նա այս պաշտոնի միակ թեկնածուն էր:
Գուտերեշը ՄԱԿ-ի ղեկավարումը ստանձնում է երկրորդ ժամկետով՝ 2022 թվականի հունվարի 1-ից մինչև 2026 թվականի դեկտեմբերի 31-ը, գրում է ՌԻԱ Նովոստին:
Լրագրողների հետ զրույցում Անտոնիո Գուտերեշը խոսել է պաշտոնավարման նախորդ հինգ տարիների ընթացքում քաղած հիմնական դասի մասին. «Մենք միայնակ չենք կարող ոչինչ անել»:
«Մենք շատ դասեր ենք քաղել, բայց ամենակարևորն այն է, որ մենք միայնակ ոչինչ չենք կարող անել։ Ամենակարևոր դասն այն է, որ մենք պետք է վերականգնենք համերաշխությունն ու վստահությունը: Եվ եթե ասում ենք, որ ես պետք է ավելի լավ բան անեմ իմ երկրորդ ժամկետում, ապա դա վերաբերում է նրան, որ իմ ուժերի ներածին չափով անելու եմ ամեն ինչ՝ վերականգնելու վստահությունը կառավարությունների, մարդկանց և հաստատությունների միջև, հավատը ՄԱԿ-ի հանդեպ»,- ասել է նա։
Գուտերեշը հավելել է, որ պաշտոնավարման երկրորդ ժամկետի ընթացքում մամուլի ազատությունը դիտարկելու է որպես «արդար աշխարհակարգի բացարձակ էական հիմք»:
«Ես անելու եմ ինձանից կախված ամեն ինչ, որպեսզի ապահովեմ, որ լրագրողների իրավունքները լիարժեք հարգվեն ամենուր և վերջ տրվի այն իրավիճակին, որի առջև այսօր կանգնած ենք, որտեղ այդքան շատ լրագրողներ հետապնդվում են՝ պարզապես ճշմարտությունն ասելու համար, իսկ նրանցից ոմանք նույնիսկ մահանում»,- ասել է նա։
Նշենք, որ Անտոնիո Գուտերեշը ՄԱԿ-ի գլխավոր քարտուղարի պաշտոնն առաջին անգամ ստանձնել է 2017 թվականի հունվարի 1-ին: Կազմակերպության գլխավոր քարտուղարն ընտրվում է հինգ տարի ժամկետով:
