19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Ամերիկացի փորձագետները` Ռուսաստանում ընդդիմության նկատմամբ բռնաճնշումների մասին
Քաղաքականություն
12.06.2021 | 18:18
Ալեքսեյ Նավալնիի հետ կապված կազմակերպությունները «ծայրահեղական» ճանաչելու Մոսկվայի քաղաքային դատարանի որոշումը Կրեմլի կողմից ռուսական ընդդիմության դեմ սկսված բռնաճնշումների շարունակությունն է: Այս կարծիքը Ամերիկայի Ձայնին տված հարցազրույցում արտահայտեց CSIS – Ռազմավարական և միջազգային հետազոտությունների կենտրոնի վերլուծաբան Սայրուս Նյուլինը:
«Մենք տեսել ենք բռնաճնշումներ, որոնք հիմնականում ծավալվել են երկու ուղղությամբ: Նախ, դրանք խիստ անհատական միջոցներ են ընդդիմադիրների դեմ՝ Նավալնի, Դմիտրի Գուդկով, Նավալնիի փաստաբան Իվան Պավլով: Կատարվել են նաև լրագրողների դեմ գործողություններ, այդ թվում՝ բերման ենթարկումը բողոքի ցույցերի ժամանակ: Եվ, իհարկե, օրենսդրական մակարդակում ջանքեր են գործադրվել, որպեսզի ընդդիմությունը հայտնվի օրենքից դուրս և կոչվի «ծայրահեղականներ»,- ասում է Նյուլինը:
Նա նաև նշել է, որ նման գործողություններ կատարելիս, Պուտինը իրեն չափազանց վստահ է զգում՝ հաշվի առնելով նաև Ռուսաստանի Սահմանադրության փոփոխությունները, որոնք թույլ են տվել «զրոյացնել» նրա նախագահական ժամկետները: Պուտինը նաև օգտվում է ԱՄՆ-ի և Եվրոպայի հետ հարաբերությունների վերջին վատթարացումից. երկրի ներսում ընդդիմության դեմ ցանկացած գործողություն դժվար թե ավելի շատ փչացնի այդ հարաբերությունները:
Միևնույն ժամանակ, Ռատգերս համալսարանի պրոֆեսոր Սերգեյ Երոֆեևը կարծում է, որ Նավալնու հիմնադրամի դեմ վերջին հարձակումը Կրեմլի կողմից սպասվող քայլ էր: Ըստ նրա՝ վերլուծաբանները երկար ժամանակ քննարկում էին Ռուսաստանում քաղաքական ակտիվության արգելման հավանական սցենարը. «Կար միայն մեկ հարց, թե ինչպես դա կձևակերպվի: Ես անձամբ ենթադրում էի, որ դրանից էլ ամեն ինչ կսկսվի: Այն, ինչ վերջերս պատահեց Եհովայի վկաների հետ, փորձարկում էր: Այսպիսով, իշխանությունները ստուգեցին իրավական մեխանիզմը, ինչպես նաև հասարակության արձագանքը: Եվ այդ ժամանակ արդեն պարզ էր, որ Նավալնիի հիմնադրամի հետ նրանք հենց այդպես էլ կվարվեին»:
Միևնույն ժամանակ, Երոֆեևը նշում է, որ ներկա ծանր իրավիճակը, որում հայտնվել է Հակակոռուպցիոն հիմնադրամը (FBK), չի նշանակում, որ նրանց գործը դադարել է գոյություն ունենալուց: Հասարակության մեջ կառուցվածքային փոփոխությունները չեն կարող չեղյալ համարվել դատարանի որոշմամբ:
