02.05.2024 | 11:27
Էս մարդկանց նպատակը տեռորն է, ոչ ավելին․ Հասմիկ Հակոբյան․ ՏԵՍԱՆՅՈՒԹ
251 հազար եվրո միայն վարագույրի համար. ի՞նչ ծալքեր կան Գագիկ Ծառուկյանի հարուստ հայտարարագրում
Հասարակություն
10.06.2021 | 18:18
Factor.am-ը շարունակում է արտահերթ խորհրդարանական ընտրություններին մասնակցող կուսակցությունների և կուսակցությունների դաշինքների ընտրական ցուցակի առաջին երեք տեղերը զբաղեցնող անձանց գույքի և եկամուտների մասին հայտարարագրերը ներկայացնող շարքը։
Խոշոր եկամուտներ` տարբեր աղբյուրներից, թանկարժեք զարդեր, տասնյակներով շարժական ու անշարժ գույք. արտահերթ խորհրդարանական ընտրություններին մասնակցող` «Բարգավաճ Հայաստան» կուսակցության առաջնորդ Գագիկ Ծառուկյանի հայտարարագիրը, թերևս, ամենահարուստն է ներկայացվածներից:
«Թանկարժեք գույք» բաժնի ներքո (Անշարժ և շարժական գույք աղյուսակներում չնշված և 8 միլիոն դրամը կամ դրան համարժեք արտարժույթը գերազանցող գույք) Ծառուկյանը հայտարարագրել է տան կահույքի հսկայական ցանկ` բազմաթիվ 0-ներով: Օրինակ` 251 հզր 799 եվրո արժողությամբ վարագույր, 305 հզր եվրո արժողությամբ մեծ ճաշասենյակի կահույք կամ ջահեր, որոնց ընդհանուր արժեքը 1մլն 587 հզր 300 եվրո է:
Ինչ վերաբերում է զարդերին, ապա Ծառուկյանի ձեռքի ոսկյա ժամացույցների արժեքը տատանվում է 100-300 հազար դոլարի, ադամանդե քարերով ոսկյա մատանիները` 700 հզր դոլարից մինչև 1 միլիոն դոլարի շրջանակում:
Ծառուկյանը հայտարարագրել է 17 թանկարժեք ավտոմեքենա: Օրինակ` 2016 թ. արտադրության Bentley Bentayga, 2019 թ. արտադրության Rolls-Royce Cullinan, 2018 թ. արտադրության Nissan Patrol Safari և այլն:
Հայաստանի ամենահարուստ քաղաքական գործիչներից մեկը` Գագիկ Ծառուկյանը բաժնեմասեր ունի 54 ընկերությունում, 20-ից ավելի անշարժ գույք ՝ Երևանում, Կոտայքի և Գեղարքունիքի մարզերում։
Խոսքը հողամասերի, հասարակական նշանակության շինությունների և անհատական բնակելի տների մասին է:
13 էջանոց հայտարարագրում նշված են նաև Ծառուկյանի եկամուտները: Դրանց մեջ մտնում են աշխատավարձերը, վարձավճարները, բանկային տոկոսները, ստացված փոխառությունները: Մեկ տարվա կտրվածքով` Ծառուկյանն Ազգային ժողովից ստացել է 7 մլն 594 հզր 150 դրամ աշխատավարձ: «Մուլտի Ուելնես կենտրոն» ՍՊԸ-ից նա ստացել է 477 մլն 755 հզր դրամ փոխառության վերադարձ:
Հայտարարագիրը ներկայացնելու օրվա դրությամբ Ծառուկյանն ունեցել է շուրջ 877 մլն դրամ, մոտ 52 մլն դոլար և շուրջ 5 մլն եվրո:
