18.12.2025 | 23:24
ՀՀ տարածքում ավտոճանապարհները հիմնականում անցանելի են
ՄԻՊ-ը՝ Գեղարքունիքում ադրբեջանցիների սպառնալիքների, ԱԳՆ-ն՝ Բաքվում գերիների «դատերի» մասին․ Լուրեր
Քաղաքականություն
04.06.2021 | 15:09
ՄԻՊ Արման Թաթոյանը ահազանգել է, որ ադրբեջանական զինված ծառայողները Գեղարքունիքի մարզի գյուղերի հարևանությամբ` արոտավայրերում ապօրինաբար կանգնեցնում են գյուղացիներին, պահանջում են տալ բացատրություններ՝ ի՞նչ ուղղությամբ են շարժվում, ի՞նչ նպատակով և ի՞նչ են տեղափոխում, փորձում են իրականացնել մեքենաների ապօրինի խուզարկություններ, սպառնում են։
—
ԱԳՆ հայտարարություն է տարածել, որում նշվում է, որ 16 հայ զինծառայողների նկատմամբ հարուցված քրեական գործերը, ինչպես նաև մյուս հայ ռազմագերիների և պատանդառված քաղաքացիական անձանց նկատմամբ իրականացվող խոշտանգումներն ու հոգեբանական ճնշումը միջազգային իրավունքի վտանգավոր խախտման նախադեպ են: Հստակ է, որ գերեվարված անձանց Ադրբեջանն օգտագործում է որպես քաղաքական պատանդ և լծակ՝ այլ խնդիրներ հետապնդելու նպատակով։
—
«Հումանիտար ականազերծման և փորձագիտական կենտրոն»-ի մասնագետները շարունակում են մաքրման աշխատանքները Սյունիքի մարզի Դավիթ Բեկ համայնքում: Մայիսին կատարած հետազոտական աշխատանքների արդյունքում հայտնաբերվել է 11 հատ КОБЭ տեսակի կասետային չպայթած ենթազինամթերք, 4 հատ «Գրադի» արկ և 1 հատ ԴՇԿ (ДШК) փամփուշտ։ Հայտնաբերված չպայթած զինամթերքը ոչնչացվել է:
—
Պատերազմից հետո Ադրբեջանի վերահսկողության տակ անցած Քարվաճառի շրջանում ականի վրա պայթել է Ադրբեջանի ՊՆ մեքենա։ Դրանում եղել են լրագրողներ, որոնցից երկուսը մահացել են։ Եվս երկու մարդ վիրավորվել է։
