Վեց զինծառայողի գերի վերցնելուց հետո Ադրբեջանի հետ ընդհատվել է ապաշրջափակման գործընթացը. փոխվարչապետի պաշտոնակատար

Չկա մի առիթ, մի հանդիպում կամ մի հնարավորություն, որտեղ գերիների հարցը չի քննարկվում, ես հուսով եմ, որ այդ հարցը լուծում կստանա: Այս մասին ԱԺ-ում լրագրողների հետ զրույցում ասաց փոխվարչապետի պաշտոնակատար Մհեր Գրիգորյանը:

Անդրադառնալով ճանապարհների ապաշրջափակման հարցով ստեղծված եռակողմ հանձնաժողովի աշխատանքներին՝ Գրիգորյանը նշեց. «Այսօրվա դրությամբ աշխատանքները չեն շարունակվում, որովհետև իրոք այդ աշխատանքները արդյունավետ կլինեն և արդյունքներ կտան մի դեպքում, եթե ֆոնը, ընդհանուր իրավիճակը լինի առնվազն կայուն: Սահմաններին այս իրադրությունների առկայության պարագայում, ես չեմ կարծում, որ հնարավոր է կոնստրուկտիվ աշխատանք այդ հարթակում: Վերջին շրջանում կոնտակտները ընդհատվել են այդ հարթակի մասով: Տեսնենք՝ ինչ շարունակություն կլինի»:

Գրիգորյանը ընդգծեց, որ աշխատանքներն ընդհատվել են մասնավորապես, այն բանից հետո, երբ Ադրբջանի զինուժը ներխուժել է ՀՀ տարածք:

Մհեր Գրիգորյանն անդրադառնալով Ալիևի հայտարարություններին Զանգեզուրի միջանցքի մասին՝ նշեց. «Միջանցքային տրամաբանության հարցեր հայկական կողմը չի քննարկել և չի քննարկելու, և հնարավոր էլ չի քննարկել նման հարց: Եթե միջանցք ասելով՝ որոշ մարդիկ նկատի ունեն տրանսպորտային ուղիներ, դա մի հարց է, բայց եթե միջանցք ասելով՝ մարդիկ նկատի ունեն սուվերենության հետ կապված որևէ հանգամանք, կրկին վստահեցնում եմ ձեզ, որ դա բացառվում է իմ քննարկումների օրակարգում»:

Մանրամասները՝ տեսանյութում: