Թուրքիան ՆԱՏՕ-ի դաշնակիցներին դրդել է մեղմացնել բելառուսական ինքնաթիռի հետ կապված կառույցի արձագանքը

Թուրքիան ՆԱՏՕ-ի իր դաշնակիցերին մղել է նվազեցնել Բելառուսի կողմից մարդատար ինքնաթիռի վայրէջքի ու լրագրողի ձերբակալման հետ կապված պաշտոնական արձագանքը։ Այս մասին Reuters-ին պատմել են գործին ծանոթ երկու դիվանագետներ։

ՆԱՏՕ-ի 30 դաշնակիցները երկու պարբերությամբ հայտարարություն էին տարածել, որով դատապարտել են Ryanair-ի չվերթում բլոգեր Ռոման Պրոտասևիչի ձերբակալումը։ Հայտարարությունը, սակայն, պակաս կոշտ էր, քան ՆԱՏՕ-ի գլխավոր քարտուղար Յեն Ստոլտենբերգի հրապարակային արտահայտությունները, որը միջադեպը որակել էր որպես «պետական առևանգում» և «վրդովեցուցիչ»։

Դիվանագետները լրատվամիջոցին պատմել են, որ Թուրքիան պնդել է՝ Բելառուսի նկատմամբ արևմտյան պատժամիջոցների ցանկացած հիշատակում և քաղբանտարկյալներին ազատելու կոչեր տեքստում տեղ չգտնեն։ Նրանք նաև հավելել են, որ հանվել են նաև Բելառուսի հետ ՆԱՏՕ-ի համագործակցության դադարեցման մասին ձևակերպումներ։

Բելառուսի հարցում Թուրքիայի այս մոտիվացիան դեռևս պարզ չէ։ Դիվանագետները նշել են, որ Անկարան, գուցե, փորձում է պահպանել իր կապերը Մոսկվայի հետ, որը Բելառուսի ամենամոտ դաշնակիցն է, ինչպես նաև պահպանել տնտեսական հարաբերությունները Բելառուսի հետ Turkish Airlines-ի միջոցով, որն ամենօրյա չվերթներ է իրականացնում Մինսկի ուղղությամբ։ Եվ մեկ պատճառ էլ կարող է լինել այն, որ Թուրքիան ցանկանում է այս ամառ համավարակից հետո ռուս զբոսաշրջիկներին հյուրընկալել։

Թուրքիայի ԱԳՆ-ն անմիջապես չի արձագանքել լրատվամիջոցի՝ մեկնաբանության խնդրանքին։ ՆԱՏՕ-ի պաշտոնյան էլ ասել է, որ ՆԱՏՕ-ի հայտարարությունը Բելառուսի մասին համաձայնեցվել է բոլոր 30 դաշնակիցների հետ կոնսենսուսով․ «Մենք չեն կարող քննարկումների մանրամասները ներկայացնել, քանի որ այն գաղտնի է»։

Լրատվամիջոցի աղբյուրները նաև նշել են, որ Թուրքիայի պնդումը վիրավորել է մի քանի դաշնակիցների, հատկապես՝ Լեհաստանին, Լատվիային ու Լիտվային։

«Շատ դաշնակիցներ հիասթափված էին Թուրքիայից: ՆԱՏՕ-ի համար կարևոր էր պատասխանել, և անհասկանալի է, թե ինչու է Անկարան ցանկանում պաշտպանել Բելառուսի նախագահ Ալեքսանդր Լուկաշենկոյին», – ասել է աղբյուրը։

Էմմա Չոբանյան