10.10.2026 | 14:28
ԵՄ-ն շնորհավորել է Երևանի 2808-ամյակը
Բարձրագույն դատական խորհրդի ապագա նախագահի անունը հայտնի է
Քաղաքականություն
21.02.2018 | 15:48
Բարձրագույն դատական խորհրդի ոչ դատավոր հինգ անդամներից երկուսի թեկնածության հարցում ՀՀ իշխանությունները արդեն իսկ կողմնորոշվել են։ Մեր տեղեկություններով, ԲԴԽ՝ խորհրդարանի կողմից նշանակվելիք անդամներից մեկը լինելու է ՀՀ ՍԴ նախագահ Գագիկ Հարությունյանը, իսկ մյուսը՝ ՍԴ նախագահի խորհրդական, Արդարադատության նախկին նախարար Գևորգ Դանիելյանը։
Ինչպես հայտնի է, բարձրագույն դատական խորհուրդը կազմված է լինելու 10 անդամներից, որոնցից 5-ին նշանակելու է դատավորների ընդհանուր ժողովը՝ դատավորների կազմից, իսկ մյուս 5-ին ընտրելու է խորհրդարանը։ ԲԴԽ հնգյակներից երեքականները նշանակվելու են հինգ տարի ժամկետով, իսկ երկուսը՝ երեք։
Բարձրագույն դատական խորհրդի՝ ԱԺ կողմից ընտրվելիք անդամների թեկնածուներին առաջադրելու են խմբակցությունները։ Հաշվի առնելով այն փաստը, որ իշխող կոալիցիան՝ ՀՀԿ-ն և ՀՅԴ-ն, խորհրդարանում բացարձակ մեծամասնություն ունի, ակնհայտ է, որ հենց նրանց առաջադրած թեկնածուներն էլ կդառնան ԲԴԽ անդամներ։
Ինչպես հայտնի է, այս տարվա մարտի 23-ին լրանում է ՍԴ նախագահ Գագիկ Հարությունյանի 70 ամյակը, որից հետո նա վայր է դնելու իր լիազորությունները։ Բայց մինչ այդ, նա արդեն նշանակված կլինի ԲԴԽ անդամ, և նույնիսկ այդ կառույցի նախագահ ընտրված կլինի, իսկ ապրիլի 9-ից կսկսի պաշտոնավարել։ Գագիկ Հարությունյանն իր հետ ԲԴԽ կտանի նաև ՀՀ ՍԴ խորհրդական, արդարադատության նախկին նախարար Գևորգ Դանիելյանին, որը կլինի ՀՀԿ-ի կողմից առաջադրված մյուս թեկնածուն։
Վահան Հարությունյան
