17.09.2026 | 11:55
Էս միտքը ծագել է Նյու Յորքի սուպերմարկետում. Փաշինյանը՝ ՀՀ-ի անվտանգության ճարտարապետության մասին․ ՏԵՍԱՆՅՈՒԹ
Պողոս Պողոսյանի սպանության վերաբացման գործով դատավորը ինքնաբացարկ չհայտնեց
Հասարակություն
21.05.2021 | 13:34
2001 թվականի սեպտեմբերի 24-ի լույս 25-ի գիշերը Հայաստանի երկրորդ նախագահ Ռոբերտ Քոչարյանի անվտանգության աշխատակից Աղամալ Հարությունյանի և Պողոսյանի միջև «Պրիվետ, Ռոբ» արտահայտության պատճառով «Առագաստ» սրճարանում տեղի ունեցած միջադեպի գործով, որն ավարտվել էր Պողոսյանի սպանությամբ, վերաբացման գործով երեկ տեղի ունեցավ հերթական դատական նիստը։
Նիստի ժամանակ Հարությունյանի պաշտպանը դատավոր Կարեն Ֆարխոյանին ինքնաբացարկի միջնորդություն ներկայացրեց, նշելով, թե դատավորի եղբայրը Ջոն Ֆարխոյանը գործի վերաբացմանը ի պաշտոնե մասնակցություն է ունեցել և դատավորի անաչառության հետ կապված կասկածներ կան։
Մեղադրող դատախազ Հայկ Խաչատրյանն առարկեց միջնորդության դեմ, նշելով, որ Ջոն Ֆարխոյանը՝ որպես Երևան քաղաքի քննչական վարչության պետ, հսկողություն է իրականացրել ժամկետների հետ կապված, և դա գործին մասնակցություն չի հանդիսանում։
Դատավորը այս միջնորդության առնչությամբ հեռացել էր որոշում կայացնելու։
Factor.am-ը տեղեկացավ, որ դատարանը մերժել է ինքնաբացարկի միջնորդությունը և կշարունակի նախագահել նիստերը։
Հիշեցնենք, որ 2020 թվականի հուլիսի 7-ին Վերաքննիչ քրեական դատարանը բավարարեց Գլխավոր դատախազության բողոքը և բեկանեց 20 տարի առաջ Երևանի «Առագաստ» սրճարանում Պողոս Պողոսյանի սպանության գործն ու այն ուղարկեց նոր քննության՝ պայմանավորված նոր երևան եկած հանգամանքներով։ Նոր երևան եկած հանգամանք էր դիտվել Մեծ Բրիտանիայի քաղաքացի Սթիվեն Ջոն Նյուտոնի ցուցմունքը։
Հիշեցնենք նաև, որ Պողոս Պողոսյանի սպանության համար Ռոբերտ Քոչարյանի թիկնազորի պետ՝ Աղամալ Հարությունյանը դատապարտվել էր 2 տարի պայմանական ազատազրկման։
Լիլիթ Շաբոյան
