«Ցավոք, կորոնավիրուսից Շիրակի մարզում ունեցանք սիմվոլ հանդիսացող դեմքերի կորուստ»․ Լեյլի Ասլանյան

Շիրակի մարզում այս պահին համաճարակային իրավիճակը բավական կայուն է, կորոնավիրուսով հիվանդների թիվը նվազել է։ Գյումրի բժշկական կենտրոնում ու Գյումրու ինֆեկցիոն հիվանդանոցում ստացիոնար բուժում իրականացնող  բաժանմունքները դադարեցրել են իրենց գործունեությունը։ Այս մասին Factor.am-ի հետ զրույցում տեղեկացրեց Շիրակի մարզպետարանի առողջապահության և սոցիալական ապահովության վարչության պետ Լեյլի Ասլանյանը։

«Մարզում կորոնավիրուսային վարակով հիվանդների ստացիոնար բուժում այլևս չենք իրականացնում, սակայն իրականացնում ենք ամբուլատոր բուժում։ Այս պահին ամբուլատոր բուժվող հիվանդների թիվը 316 է։ Նրանք պոլիկլինիկաներում գտնվում են բուժման և ընտանեկան բժիշկների հսկողության տակ»,- ասաց Լեյլի Ասլանյանը։

Նա հավաստիացրեց, որ վիրուսի առանձին օջախներ չկան Շիրակի մարզում․ վարակը սփռված է մարզի ողջ տեղանքով։

Մարզի առողջապահության պատասխանատուից հետաքրքվեցինք նաև մահվան դեպքերով։ Նա տեղեկացրեց, որ համավարակի տարածման սկզբից՝ ներառյալ այս ապրիլը, Շիրակի մարզում գրանցվել է կորոնավիրուսային վարակի 8․627 դեպք,  որից 205-ը՝ մահվան ելքով։

Լեյլի Ասլանյանը նշեց, որ վերջին շրջանում հեղինակավոր գյումրեցիներ մահացան կորոնավիրուսից։

«Ցավոք, մեր մարզում ունեցանք սիմվոլ հանդիսացող դեմքերի կորուստ․ մարզի գլխավոր մանկաբարձ-գինեկոլոգ Ֆելիքս Գրիգորյանը, մշակույթի վաստակավոր գործիչ, Գյումրու կոլորիտային դեմքերից Հասմիկ Կիրակոսյանը։ Մեր մեծերն են, կուզենայինք երկար ապրեին, միշտ մեր կողքին նրանց ներկայությունը զգայինք»,-ասաց Լեյլի Ասլանյանը։

Մեր զրուցակիցը նաև տեղեկացրեց, որ մայիսի 15-ից հանրապետությունում մեկնարկած պատվաստումների գործընթացը բավական ակտիվ է ընթանում Շիրակի մարզում։

1․585 քաղաքացիներ արդեն պատվաստվել են։ «Սպուտնիկ V»-ով պատվաստվածների թիվը 855 է, «ԱստրաԶենեկա»-ով՝ 730։

Նա ասաց, որ առաջարկով դիմել են առողջապահության նախարարին՝ թույլատրելու բնակիչներին ընտրելու պատվաստանյութը․ այս պահին «Սպուտնիկ V»-ով պատվաստվելու իրավունք է տրված 18-54 տարեկան քաղաքացիներին, իսկ 55 տարեկանից բարձր անձանց համար նախատեսված է «ԱստրաԶենեկա»։

Լեյլի Ասլանյանը նաև տեղեկացրեց, որ շուտով շիրակցիներին հասանելի կլինի Հայաստան ներկրված չինական պատվաստանյութը, որը ներարկելու համար տարիքային սահմանափակում չկա։

Արմիկ Մովսիսյան