17.02.2026 | 12:55
Ուկրաինան հայտնում է ՌԴ-ի կողմից զանգվածային հարձակման մասին. շուրջ 400 ԱԹՍ և հրթիռ է խոցվել
2018-ին Ադրբեջանից Հայաստան փոխանցվել է 211 մլն դոլար․ թեժ բանավեճ Համաշխարհային բանկի զեկույցի շուրջ. ՏԵՍԱՆՅՈՒԹ
Տնտեսություն
28.04.2021 | 14:44
«Ես հրապարակել էի ՀԲ 2018 թվականի հաշվետվությունները, որում արձանագրել էի, որ 2017 թվականի համեմատ 30 անգամ աճ էր Ադրբեջանից Հայաստան կատարված փոխանցումները՝ հասնելով 211 մլն դոլարի և իմ հիմնական մտահոգությունն այդտեղ էր»,- ԱԺ տնտեսական հարցերի մշտական հանձնաժողովի նիստում հայտնեց «Լուսավոր Հայաստան» խմբակցության պատգամավոր Արմեն Եղիազարյանը:
Նա ներկաներին տեղեկացրեց, որ խնդիրը բարձրացնելուց հետո Կենտրոնական բանկից պատասխանել են, որ այն որոշակի մեթոդաբանության կիրառման արդյուքն է և բազային արժեքներն այն անձինք են, որոնք նախորդ դարի 90-ական թվականներին Հայաստանից Ադրբեջան են տեղափոխվել և այնտեղից եկել այստեղ:
«Ես էլ մտահոգություն հայտնեցի, որ 90 ականներից հետո տեղաշարժ չի գրանցվել, ապա ինչո՞ւ է 2017 թ.-ի 7 մլն դոլարը 2018 թ.-ին դարձել 211 մլն և այդ հարցի պատասխանն ինձ չի տրվել»,- հայտարարեց պատգամավորը և տեղեկցրեց, որ իր հայտարարությունից հետո ՀԲ կայքից հեռացրել են այդ հաշվետվությունները:
Պատգամավորն այն տարօրինակ է համարել և դիմել ԱԱԾ-ին, որպեսզի պարզաբանեն, թե ինչ է տեղի ունեցել:
Եղիազարյանը նաև հայտնեց, որ Հայաստանի Կենտրոնական բանկի հետ ուսումնասիրել են և պարզել, որ Հայաստանի բանկային համակարգով որևէ փոխանցում չի գրանցվել:
«Ինձ համար տարօրինակ է, որ Համաշխարհային բանկի նման կառույցը պատերազմող երկրների վերաբերյալ նման ցուցանիշ է զետեղում և այսքան ժամանակ՝ 3 տարի, որևէ մեկը դրան չի անդրադարձել»,- նկատեց պատգամավորը:
«2018 թվականին, ըստ ՀԲ մեթեդաբանության, Ադրբեջանից Հայաստան փոխանցվել է 211 մլն դոլար, Հայաստանից Ադրբեջան՝ 84 մլն, իսկ 2017 թվականի Ադրբեջանից Հայստան փոխանցվել է 7 մլն դոլար, Հայաստանից Ադրբեջան՝ 174 մլն դոլար»,- ընդգծեց ԱԺ տնտեսական հարցերի մշտական հանձնաժողովի նախագահ Բաբկեն Թունյանը՝ հավելելով, որ դա հնարավոր չէ, և այս հաշվետվության տվյալները արժանահավատ չեն:
Մանրամասները՝ տեսանյութում:
