Հարկային եկամուտները գերակատարվել են, բայց նաև՝ նվազել․ վարչապետի հայտարարության հետքերով

Ապրիլի սկզբին Կառավարության հերթական նիստը սկսվեց տնտեսության ոլորտին առնչվող «դրական» լուրերով։ Վարչապետի խոսքով՝ այս տարվա առաջին եռամսյակում պետական բյուջեի եկամուտները գերակատարվել են ավելի քան 20 միլիարդ դրամով։ ՊԵԿ նախագահ Էդվարդ Հովհաննիսյանը մանրամասնեց․

«Առաջին եռամսյակի համար սահմանված է եղել 305 միլիարդ դրամ, փաստացի հավաքագրված եկամուտները կազմել են 332,9 միլիարդ դրամ։ Դրական տարբերությունը կազմում է 27,9 միլիարդ դրամ։ Հարկային եկամուտների գերակատարման փաստացի արդյունքը կազմելու է 22,3 միլիարդ դրամ»,- նշեց նախարարը:

Վարչապետի և ՊԵԿ նախագահը ներկայացնելով թվերը չնշեցին, թե, այնուամենայնիվ, նախորդ տարվա համեմատ հարկային եկամուտների մասով աճ է գրանցվել, թե նվազում։

Օրեր առաջ Պետական եկամուտների կոմիտեն հրապարակել է այս տարվա առաջին եռամսյակում հավաքագրված հարկային եկամուտների և պետական տուրքերի վերաբերյալ տվյալները։

Ըստ ՊԵԿ տվյալների՝ այս տարվա հունվար-մարտ ամիսներին պետական բյուջե հաշվեգրված հարկերն ու պետական տուրքերը կազմել են 332,9 միլիարդ դրամ՝ նախորդ տարվա նույն ժամանակահատվածի 349 միլիարդ դրամի փոխարեն։ Ստացվում է՝ որ այս տարվա առաջին եռամսյակում բյուջե մուտք գործած գումարները նվազել են 16,1 միլիարդ դրամով կամ 4,6 %-ով։

Միայն մարտ ամսին բյուջե մտած գումարները նախորդ տարվա նույն ամսվա համեմատ փոքր ինչ աճ են արձանագրել։ Այսպես․ եթե նախորդ տարվա մարտին հարկային եկամուտները կազմել են 117 միլիարդ դրամ, ապա այս տարի այն կազմել է 121,1 միլիարդ դրամ՝ աճելով 4,1 միլիարդ դրամով կամ 3,5 %-ով։

Հիշեցնենք, որ նախորդ տարվա մարտ ամսին Հայաստանում կորոնավիրուսի տարածմամբ պայմանավորված արտակարգ դրություն էր հայտարարված, ինչպես նաև գործում էին տնտեսական գործունեության մի շարք սահմանափակումներ։

Այսպիսով, չնայած նրան, որ բյուջեի հարկային եկամուտները այս տարվա առաջին եռամսյակում գերակատարվել են, այնուամենայնիվ, նախորդ տարվա նույն ամիսների հետ համեմատ նվազում է արձանագրվել, ինչի մասին կառավարության անդամներն այդպես էլ չհիշատակեցին՝ ընդգծելով միայն գերակատարման փաստն ու այն ներկայացնելով որպես դրական տեղաշարժ։

Անժելա Պողոսյան