08.11.2024 | 13:07
Դժգոհության մեծ ալիք քաղաքացիների մոտ չեմ նկատել. ՔՊ անդամ․ ՏԵՍԱՆՅՈՒԹ
Թուրքիան` ռուս-ուկրաինական հակամարտության միջև. VOA
Քաղաքականություն
14.04.2021 | 22:35
Ռուս-ուկրաինական հարաբերությունների լարվածության պայմաններում մեջտեղում է այսօր հայտնվում Թուրքիան: Երբ ռուսական եւ ուկրաինական զորքեր են կուտակվում Դոնբասի շուրջը, Էրդողանը հայտնվում է որպես ուկրաինական կողմից պաշտպան, գրում է Ամերիկայի ձայնը:
«Որպես Թուրքիա, մենք հստակ կերպով պաշտպանում ենք Ուկրաինայի տարածքային ամբողջականությունն ու ինքինշխանությունը», հայտարարել է նա Անկարա ժամանած Ուկրաինայի նախագահի հետ հանդիպման ժամանակ:
Երկու այս պետությունները, որոնք ունեն պաշտպանական բնագավառում համագործակցության պայմանագիր, գուցեեւ քննարկում են ուկրաինական նավատորմը թուրքական արտադրության ԱԹՍ-ներով համալրելու հարցը:
Պաշտպանության հարցերով թուրք վերլուծաբան Արդա Մեվլութօղլուի խոսքերով, «Սիրիայում, Լիբիայում ու Լեռնային Ղարաբաղում թուրքական դրոնների ցույց տված արդյունքը գայթակղել է Ուկրաինային ձեռք բերելու համար նման սարքեր այնպիսի վճռորոշ տարածքներում կիրառելու նպատակով, ինչպիսին է Դոնբասը»:
Սակայն թուրքական ԱԹՍ-երի կիրառումն Ուկրաինայում կարող է սրել լարվածությունը Թուրքիայի ու Ռուսաստանի միջեւ:
Ինչպես Արտաքին քաղաքականության հարցերով Թուրքիայի հաստատության տնօրեն Հուսեյին Բագչին է ասում, «Եթե Ուկրաինան թուրքական դրոններ կիրառի ռուսական հրասայլերի դեմ, այնժամ մենք կունենանք խնդիրներ»: Չնայած դրան, Թուրքիան կարծես թե արդեն պատրաստվում է եւս 25 դրոն վաճառել Ուկրաինային:
Ռուսաստանի արտգործնախարար Սերգեյ Լավրովը երկուշաբթի օրը նախազգուշացրել էր Անկարային հեռու մնալ զենքերի նոր վաճառքից: Դրան զուգահեռ, Ռուսաստանը ժամանակավորապես դադարեցնում է ճամփորդական թռիչքները դեպի Թուրքիա, պատճառաբանում քովիդ հիվանդության տարածումը: Սակայն փորձագետները լավ են հասկանում, որ այն Մոսկվայի կողմից ճնշում գործադրելու գուցե առաջին քայլն է:
Ճնշում գործադրելու մյուս եղանակը քովիդի դեմ բավարար քանակով պատվաստանյութ չունենեցող Թուրքիային ռուսական պատվաստանյութ տրամադրել-չտրամադրելու հարցն է: Ռուսաստանն, ըստ վերլուծաբանների, Ուկրաինայի հարցով Թուրքիայի նկատմամբ այժմ կիրառում է նաեւ պատվաստանյութի գործոնը:
Իսկ այսօր թուրքական հանգստավայրերը, որոնք սովորաբար լի են լինում Ռուսաստանից ժամանած զբոսաշրջիկներով, թվում է, որ դեռ երկար կմնան դատարկ այնպես, ինչպես դատարկ են այսօր:
