17.09.2026 | 16:50
Ադրբեջանի ցամաքային սահմանները փակ կմնան մինչև 2027 թվականի հունվարի 2-ը․ COVID-19-ի կարանտինային ռեժիմը կրկին երկարացվել է
ԵՄ-ն հիասթափված է Վրաստանից․ դատավորների ընտրության կարգի վերաբերյալ շտապ որոշումներ են կայացվել
Քաղաքականություն
08.04.2021 | 13:20
Եվրամիությունը մատնանշել է մի շարք թերություններ Վրաստանի խորհրդարանի կողմից օրենսդրական փոփոխությունների ընդունման գործընթացում, որոնցով փոփոխվել է Գերագույն դատարանի դատավորների ընտրության կարգը: Համապատասխան հայտարարությունը տարածել է ԵՄ արտաքին քաղաքական ծառայության ներկայացուցիչ Նաբիլ Մասրալին:
Հայտարարության մեջ շեշտվում է, որ ընթացակարգերի վերանայումը Թբիլիսիին ֆինանսական օգնություն հատկացնելու պայմաններից մեկն է։ Խոսքը, մասնավորապես, ԵՄ մակրոֆինանսական օգնության երկրորդ տրանշի մասին է՝ շուրջ 60 միլիոն եվրոյի չափով, որը Վրաստանը նախատեսում է ստանալ 2021 թվականի հոկտեմբերին:
«ԵՄ-ն ողջունում է ընտրական գործընթացի շրջանակում օրենսդրությունը փոխելու նախաձեռնությունը, բայց հիասթափեցնող է, որ Վրաստանի խորհրդարանը շուտափույթ և առանց համապարփակ խորհրդակցության պատրաստեց ու ընդունեց այդ փոփոխությունները: Մենք ցավում ենք, որ Վրաստանն օրենսդրության մեջ փոփոխություններ կատարեց շտապ՝ առանց ժամանակին Վենետիկի հանձնաժողով հայց ուղարկելու կամ վերջնական եզրակացությունը ստանալու»,- ասված է հայտարարության մեջ:
Եվրամիությունը հորդորում է Վրաստանին հնարավորինս շուտ գնահատական պահանջել Վենետիկի հանձնաժողովից՝ պարզելու համար, թե ընդունված փոփոխությունները համապատասխանո՞ւմ են Եվրոպայի խորհրդի խորհրդատվական մարմնի նախորդ առաջարկություններին:
Տաթև Ֆռնագյան
