09.06.2026 | 23:19
Կանանց Հայաստանի հավաքականը 0:6 հաշվով պարտվեց Բելառուսին. ՏԵՍԱՆՅՈՒԹ
Չինաստանը ԵՄ-ի նկատմամբ պատասխան պատժամիջոցներ է սահմանել․ Reuters
Քաղաքականություն
23.03.2021 | 13:50
Միացյալ Նահանգները, Եվրամիությունը, Մեծ Բրիտանիան և Կանադան պատժամիջոցներ են սահմանել Չինաստանի պաշտոնյաների նկատմամբ՝ Սինցզյան ինքնավար շրջանում մարդու իրավունքների ոտնահարումների պատճառով: Ի պատասխան ԵՄ պատժամիջոցների՝ Չինաստանը պատժամիջոցներ է սահմանել եվրոպացի օրենսդիրների, դիվանագետների և հաստատությունների նկատմամբ՝ արգելելով նրանց Չինաստանի հետ առևտուր անել։ Այս մասին հայտնում է Reuters-ը։
Արևմտյան կառավարությունները ձգտում են պատասխանատվության ենթարկել Պեկինին՝ Չինաստանի հյուսիս-արևմուտքում մուսուլման ույղուրների զանգվածային ձերբակալությունների համար, որտեղ, ըստ ԱՄՆ-ի, Չինաստանը ցեղասպանություն է իրականացնում։ Reuters-ի փոխանցմամբ՝ չինական կողմը դա հերքել է։
«Միջազգային դատապարտման աճին զուգահեռ՝ Չինաստանը շարունակում է ցեղասպանություն և մարդկության դեմ հանցագործություններ իրականացնել Սինցզյան ինքնավար շրջանում», – այս շաբաթ Բրյուսելում ԵՄ-ի և ՆԱՏՕ-ի նախարարների հետ հանդիպումներից առաջ հայտարարել է ԱՄՆ պետքարտուղար Էնթոնի Բլինկենը:
ԵՄ անդամ պետություններից բացի, Չինաստանին այս հարցով քննադատել են նաև Ավստրալիան և Նոր Զելանդիան։
ԵՄ-ի անդամ բոլոր 27 պետությունների կառավարությունները համաձայնել են պատժիչ սահմանափակումների հետ, սակայն Հունգարիայի արտաքին գործերի նախարար Պետեր Սիյարտոն դրանք «վնասակար» և «անիմաստ» է համարել։
Հիշեցնենք՝ երեկ հայտնի դարձավ, որ Եվրամիության անդամ 27 պետությունների արտաքին գործերի նախարարները համաձայնեցրել են նոր պատժամիջոցների սահմանումը 11 ֆիզիկական անձանց նկատմամբ, այդ թվում՝ Ռուսաստանից և Չինաստանից:
Նոր պատժամիջոցները վերաբերում են Չինաստանի չորս պաշտոնյայի և մեկ իրավաբանական անձի, որոնք, ենթադրաբար, խախտել են ույղուր փոքրամասնության իրավունքները։
Կասկածներ կան, որ Չինաստանի Սինցզյան ինքնավար շրջանում գտնվող համակենտրոնացման ճամբարներում կան լուրջ չարաշահումներ, ինչպիսիք են զանգվածային կամայական կալանքը, խոշտանգումները և հարկադիր քաղաքական ինդոկտրինացիան:
Նշվում է, որ ԵՄ-ն մշտապես փորձել է խուսափել Պեկինի հետ առճակատումից և նոր պատժամիջոցները, 1989 թվականից ի վեր, առաջինն են:
Նելլի Մելքոնյան
