Հասարակություն
18.02.2021 | 17:43
Գիրք նվիրելու օրվան ընդառաջ՝ Հայաստանի պետական տնտեսագիտական համալսարանի Գյումրու մասնաճյուղում իր տեսակի եզակի մեջ հանրային QR գրադարան է բացվել։ Նախաձեռնության նպատակն է՝ նորագույն տեխնոլոգիաների միջոցով երիտասարդներին հաղորդակից դարձնել արդի գրականությանն ու ստեղծել միջավայր, որը կնպաստի ընթերցանությանը։
Ի դեպ՝ գրադարանից կարող են օգտվել ոչ միայն բուհի ուսանողները, այլև տնտեսագիտությամբ ու հարակից ոլորտներով հետաքրքրված բոլոր անձինք՝ առանց որևէ սահմանափակման։ Գրադարանի ստեղծումն ինչ-որ չափով կակտիվացնի նաև տեղի բնակիչների կյանքը՝ ապահովելով նրանց հաճելի ժամանցն ու ինքնակրթության հնարավորությունը, քանի որ թաղամասը ծայրամասային է, իսկ կենտրոնական ու մարզային գրադարանները բավական հեռու են՝ քաղաքի կենտրոնում:
Ի տարբերություն ավանդական գրադարանների՝ այստեղ կարիք չկա գրանցվել, անձնագիր ներկայացնել։ Ընդամենը պետք է մուտք գործել սրահ, ընտրել գիրքն ու սքանավորել պատին փակցված համապատասխան QR կոդը: Սրահում կան առանց սահմանափակման ինտերնետ հասանելիություն, պլանշետներ, ստեղծված է հարմարավետ միջավայր ընթերցանության համար:
ՀՊՏՀ Գյումրու մասնաճյուղի տնօրենի պաշտոնակատար Կարեն Պետրոսյանի խոսքով՝ գրադարանում 8 բաժին կա, յուրաքանչյուրում՝ մոտ 100 մասնագիտական գիրք, սակայն նախատեսվում է անընդհատ ավելացնել գրականության քանակն ու ուղղվածությունը՝ ներառելով նաև գեղարվեստական արդի գրականություն:
«Ուսանողները սմարթֆոնների համար նախատեսված «Qrreader» հավելվածի միջոցով հնարավորություն ունեն անմիջապես ներբեռնել գրքերի PDF տարբերակներն իրենց հեռախոսների կամ գրադարանում առկա պլանշետների մեջ: Բացի այդ, QR գրադարանում ընդգրկված են այնպիսի ուսումնական նյութեր և ձեռնարկներ, որոնք շատ հաճախ հնարավոր չէ գտնել գրադարաններում»,- ասաց Կարեն Պետրոսյանը։
ՀՊՏՀ ռեկտոր Դիանա Գալոյանն էլ հույս հայտնեց, որ ուսանողները կսկսեն ավելի շատ կարդալ, իսկ ստացած գիտելիքները կուղղեն մարզի ու հանրապետության տնտեսության զարգացմանը:
Ուսանողներն էլ իրենց հերթին մեծ ոգևորությամբ նշեցին, որ շատ լավ հնարավորություն է ստեղծվել՝ արդի մասնագիտական գրականությանը ծանոթանալու, ինքնակրթվելու, միաժամանակ՝ լավ ժամանց անցկացնելու համար։
Բուհի գրադարանավար Տաթև Ղազարյանը Factor.am-ի հետ զրույցում նշեց, որ գրադարանն այն միջավայրերից է, որտեղ և՛ ուսանողները, և՛ դասախոսները, և՛ հասարակության լայն շրջանակների ներկայացուցիչներ կցանկանան նստել, վայելել միջավայրը, ժամանակ տրամադրել՝ ավելացնելու իրենց գիտելիքները:
«Սա լիարժեք ձեռքբերում է թե՛ մեր բուհի, թե՛ քաղաքի համար, քանի որ հիմա ունենք նմանը չունեցող գրադարան, նմանը չունեցող միջավայր մեր քաղաքում։ Իսկ թե սա որքանով կնպաստի ընթերցանությանը, հստակ կարող եմ ասել՝ դրական ազդեցություն կունենա»,- ասաց Տաթև Ղազարյանը՝ հավելելով, որ ստեղծել են 2 միջավայր․ մեկը՝ այն մարդկանց համար, ովքեր հոգնել են օնլայն ձևաչափերից, մյուսը՝ նրանց համար, ովքեր սիրում են նորարարություններ:
Էմմա Չոբանյան
