Սեֆիլյանի գործով դատական նիստն՝ առանց Սեֆիլյանի

Ժիրայր Սեֆիլյանի և մյուսների գործով դատական նիստը մեկնարկեց առանց Ժիրայր Սեֆիլյանի մասնակցության: Փաստաբանները միջնորդել էին, որպեսզի Սեֆիլյանին թույլատրվի մասնակցել դատարան նիստին, նշենք, որ երկու նիստ առաջ, Ժիրայր Սեֆիլյանը, Գևորգ Սաֆարյանը հրաժարվել էին պաշտպաններից ու լքել նիստերի դահլիճը՝ ի աջակցություն հացադուլավոր ընկերների:

Դատավոր Տաթևիկ Գրիգորյանը նրանց նկատմամբ սանկցիա էր կիրառել՝ չորս ժամով հեռացնելով նիստերի դահլիճից: Փաստաբանների միջնորդությունը դատավորը մերժեց, ասելով, որ ինքը չի զրկում Սեֆիլյանին արդար դատաքննության իրավունքից:

«Ամբաստանյալ Սեֆիլյանն է իր գործողություններով զրկել իրեն դատավարությանը մասնակցելուց և ապացույցների վերաբերյալ կարծիք հայտնելու իրավունքից»,- ասաց Գրիգորյանը:

Սեֆիլյանի պաշտպան Արայիկ Պապիկյանը հրապարակում էր գործում առկա այն ապացույցները, որոնք, ըստ իրենց, խախտումներով են ձեռք բերվել:

«ԱԱԾ-ն գործի նյութերը, գաղտնալսումներից տասն ամիս անց ուղարկում է Գլխավոր դատախազություն, որտեղից էլ 2015 փետրվարի 18-ին, Կոստանյանը գործն ուղարկում է ՀՀ քննչական կոմիտե: Այստեղ քննիչ Մակինյանի կողմից, փետրվարի 18-ին կայացվում է որոշում 2015 թվականի ապրիլի 24-ին մի խումբ անձանց կողմից զանգվածային անկարգություններ հրահրելու նախապատրաստության փաստի առթիվ հարուցել քրեական գործ: Սա նշանակում է Ժիրայր Սեֆիլյանին տասը ամիս ԱԱԾ-ն հետապնդել է»,- ասաց փաստաբանը:

Լիլիթ Շաբոյան