Ցուցարարները Բրյուսելում սևամորթ ներգաղթյալի մահվանից հետո հրկիզել են ոստիկանական տեղամասը․ ՏԵՍԱՆՅՈՒԹ

Բրյուսելում ցուցարարները հրկիզել են ոստիկանական տեղամասը 23-ամյա սևամորթի՝ ոստիկանության կողմից ձերբակալությունից հետո մահվան պատճառով։ Այս մասին հայտնում է տեղի BX1 հրատարակչությունը։

Բողոքի ցույցերն ընթացել են քաղաքի հյուսիսային մասում։ Ցույցերի ընթացքում ցուցարարների խմբի ու ոստիկանության միջև բախումներ են գրանցվել, վնասվել են ոստիկանական մեքենաներ։ Հրատարակչության տեղեկությունների համաձայն՝ ցույցերը սկսվել են խաղաղ։ Նախնական գնահատականների համաձայն՝ դրանց մասնակցել է շուրջ 400 մարդ։ Ցույցերի մասնակիցները ոստիկանների ուղղությամբ քարեր են շպրտել, քանի որ այն մի քանի անգամ ջրցան մեքենաներ է կիրառել նրանց դեմ։ Ցուցարարների գործողությունների արդյունքում կոտրվել են ոստիկանական մեքենայի ապակիները։ Դեպքի վայրում հրդեհներ են բռնկվել, այդ թվում նաև՝ ոստիկանական տեղամասում։ Դրանից հետո ոստիկանները ձերբակալել են ցուցարարներին։

Հավելենք, որ բողոքի ցույցերի առիթ էր դարձել ձերբակալված Իբրահիմ անունով 23-ամյա ներգաղթյալի մահը։ Բրյուսելի դատախազություն միջադեպի մասին տեղեկություններ են ստացվել հունվարի 9-ին։ Ներգաղթյալը փորձել է փախուստի դիմել ստուգման ժամանակ, որը իրականացվել էր կորոնավիրուսային համաճարակի ֆոնին, սակայն ձերբակալվել է։

Իրավապահ մարմինների վարկածով՝ ցուցարարը կորցրել է գիտակցությունը ոստիկանության տեղամաս տեղափոխելու ճանապարհին։ Երիտասարդին տեղափոխել են հիվանդանոց, որտեղ մի քանի ժամ անց վերջինս մահացել է։ Սակայն, ըստ ցուցարարների, ներգաղթյալի մահվան մեղավորները ոստիկաններն են։

Տեղի լրատվամիջոցները հայտնում են, որ Բրյուսելում  անկարգությունների պահին այդ նույն փողոցում է գտնվել նաև  Բելգիայի թագավոր Ֆիլիպի ավտոշարասյունը։ Սակայն ոստիկանության օգնությամբ միապետը կարողացել է հեռանալ դեպքի վայրից։

Տաթև Ֆռանգյան