29.04.2026 | 11:55
Թրամփը հանձնարարել է իր օգնականներին պատրաստվել Իրանի երկարաժամկետ շրջափակմանը. WSJ
Հրազդան-Երևան երթուղու ուղեվարձը 100 դրամով թանկացել է. քաղաքացիների արձագանքը
Հասարակություն
10.01.2018 | 16:22
Հունվարի 1-ից դիզելային վառելիքի, բենզինի և սեղմված գազի թանկացումների հետևանքներն արդեն նկատելի են: Factor.am-ին հայտնի դարձավ, որ Հրազդան-Երևան երթուղին սպասարկող տրանսպորտի սակագինը բարձրացել է: Նախկին 400 դրամի փոխարեն քաղաքացիներն արդեն ստիպված են վճարել 500 դրամ:
ՀՀ տրանսպորտի, կապի և տեղեկատվական տեխնոլոգիաների նախարարության մամուլի խոսնակ Անահիտ Առաքելյանը մեզ հետ զրույցում պարզաբանեց. «Երթուղին մրցույթը շահել է հենց 500 դրամով, ինչ-որ ժամանակահատված՝ որպես բարի կամքի դրսևորում, սպասարկել է 400 դրամով: Հիմա սկսել է սպասարկել այն գնով, որով մրցույթը շահել է: Դա թանկացում չի համարվում»:
Ըստ մամուլի խոսնակի՝ մրցույթը շահողը կարող է ուղավարձն ինջեցնել, բայց բարձրացնելու իրավունք չունի:
Քաղաքացիների պատմելով՝ Հրազդան մեկնող տաքսիները ևս թանկացրել են ուղեվարձը՝ 500 դրամից դարձնելով 600 դրամ: Նախարարության խոսնակից հետաքրքրվեցինք՝ նման ահազանգեր ստացե՞լ են կամ պարզել են՝ կա՞ն արդյոք թանկացումներ, Անահիտ Առաքելյանն ասաց՝ տաքսիների հետ կապված գնային վերահսկողություն չկա:
Հրազդան-Երևան երթուղին սպասարկող «Վիլ լայն» ընկերության տնօրեն Վիգեն Մարկոսյանը Factor.am-ի հետ զրույցում պարզաբանեց՝ ուղեվարձի թանկացումը պայմանավորված է դիզելային վառելիքի թանկացմամբ: «Մենք, ի տարբերություն մնացածի, ժողովրդի մասին ավելի շատ ենք մտածում և հունվարի 4-ից ենք թանկացրել: Էդ 4 օրն էլ ժողովրդի մասին ենք մտածել»,- ասաց Վիգեն Մարկոսյանը՝ նկատելով, որ երկու տարի առաջ նույնպես 500 դրամ էր ուղեվարձը, սակայն դիզվառելիքի գնի իջեցման պատճառով տրանսպորտի սակագինը նույնպես իջեցրել են:
«Էս բարձրացումը 60-70 դրամով մեզ համար ոնց որ կրկնակի բարձրացում լիներ: Հիմա այլևս հնարավոր չէ այդպես աշխատել, մենք այս թանկացումների պատճառով մինուսով էինք աշխատում»,- եզրափակեց «Վիլ լայն» ընկերության տնօրենը՝ հավելելով, որ իրենց միկրոավտուբուսների 90 տոկոսն աշխատում է դիզելային վառելիքով:
Մանրամասները՝ տեսանյութում:
Շողիկ Գալստյան
