Ի՞նչ սպասել վարձով ապրող կառավարությունից

Կառավարությունը շարունակում է պետական բյուջեն մսխելու և այդպիսով՝ յուրայիններին հարստացնելու քաղաքականությունը: Այսպես. դեկտեմբերի 28-ի նիստում ներկայացված է նախագիծ՝ 2014-16 թվականներին ընդունած երեք որոշումներում փոփոխություն կատարելու վերաբերյալ:

Դրանով ՀՀ ֆինանսների, միջազգային տնտեսական ինտեգրման և բարեփոխումների նախարարություններն ու ԱՎԾ Երևան քաղաքի գործակալությունը 2018-ին ևս կշարունակեն գրասենյակային տարածքներ վարձակալել «Հանարդնախագիծ» ԲԲԸ-ից: Այդ նպատակով պետբյուջեից կտրամադրվի 148 մլն դրամ:

Նշենք, որ «Հանարդնախագիծ» ընկերությունը պատկանում է բնապահպանության նախկին նախարար, այժմ ԱԺ ՀՀԿ խմբակցության պատգամավոր  Արամ Հարությունյանին:

Հարց է ծագում, թե ինչո՞ւ է կառավարությունը 148 մլն դրամով շարունակում հարստացնել պատգամավորին, եթե ունի չվճարելու տարբերակներ: 

Հիշեցնենք, որ դեռեւս 2016թ. մարտի 31-ին, վարչապետ Հովիկ Աբրահամյանն անդրադառնալով տարբեր գերատեսչություններին պատկանող շենք-շինություններին, ամոթանք էր տվել՝ նշելով, որ   պետությունը  պարապուրդի մատնված  բազմաթիվ շենքեր ունի, բայց տարածք է վարձակալում:

Այդ ժամանակ վարչապետը հստակ հանձնարարական տվեց՝ գույքը հաշվել և արագորեն եզրակացություն տալ: Մինչև Արման Սահակյանը գույքը հաշվեց, տևեց 14 ամիս, և Հովիկ Աբրահամյանն այլևս վարչապետ չէր: Իսկ արդեն  Կարեն Կարապետյանն  այլ մոտեցում ուներ: 2017թ. մայիսի 25-ի նիստում կառավարությունը որոշում կայացրեց 47 անուն պետական անշարժ գույք մասնավորեցնելու մասին:

Փաստորեն, կառավարությունը վաճառում է պետական գույքը, իսկ պետական հաստատությունները՝ վարձով են աշխատում:

Առավել մանրամասն՝ տեսանյութում:

Սևակ Հակոբյան