08.11.2024 | 20:43
Կապանում ՍՊԸ-ի տնօրենին ծանր մարմնական վնասվածքներ հասցնելու վարույթով կալանավորվել է երկու անձ. ՔԿ
Էգեյան ծովում գրանցված երկրաշարժի զոհերի թիվը հասել է 81-ի
Քաղաքականություն
02.11.2020 | 12:43
Թուրքիայի Իզմիր նահանգում շարունակվում են փրկարարական-որոնողական աշխատանքները, որտեղ հոկտեմբերի 30-ին Էգեյան ծովում գրանցված երկրաշարժի հետևանքով զոհերի թիվը հասել է 79-ի։ Reuters-ի տվյալներով՝ Հունաստանում ու Թուրքիայում երկրաշարժի հետևանքով զոհերի ընդհանուր թիվը կազմել է 81։ Հունական Սամոս կղզում երկու անչափահաս է զոհվել։
Տեղեկացվում է, որ Իզմիրում երկրաշարժից 65 ժամ անց հաջողվել է փլատակների տակից ողջ դուրս բերել Էլիֆ անունով փոքրիկի, որի երկու քույրերն ու եղբայրը մոր հետ միասին փրկվել էին կիրակի։
Թուրքական Իզմիրում ու հունական Սամոսում նոր ցնցումների մտավախությունից բնակիչները չեն ցանկանում վերադառնալ իրենց տներն ու գերադասում են գիշերել վրաններում կամ մեքենաներում։ Բնակիչներին շուրջ 3․500 վրան է տրամադրվել, ինչպես նաև 13․000 մահճակալ։
Միաժամանակ, նշվում է, որ Իզմիրում երկրաշարժի հետևանքով վիրավորների թիվը հասել է 962-ի։ 740 վիրավոր արդեն դուրս է գրվել հիվանդանոցներից։
Հավելենք, որ սա Վանում 2011 թվականին գրանցված երկրաշարժից հետո Թուրքիայում գրանցված ամենամահաբեր երկրաշարժն է։
Ելնելով աշխարհագրական դիրքից՝ Թուրքիայում երկրաշարժները հաճախ են գրանցվում։ 1999 թվականին այստեղ գրանցված երկու հզոր երկրաշարժերի զոհերի թիվը հասել է 18․000-ի։
Տաթև Ֆռանգյան
