18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
Թուրք-ադրբեջանական ստրատեգների ակնկալած նոր բնագիծը չի հաջողվել արձանագրել․ Ադրբեջանում ռազմական հեղաշրջման պոտենցյալ կարող է լինել․ Հայկ Դեմոյան. ՏԵՍԱՆՅՈՒԹ
Քաղաքականություն
16.10.2020 | 16:29
Թուրք-ադրբեջանական ստրատեգների ակնկալած նոր բնագիծը չի հաջողվել արձանագրել: Այս մասին այսօր լրագրողների հետ զրույցում ասաց ցեղասպանագետ Հայկ Դեմոյանը:
«Այն, ինչ կար Ադրբեջանի և Թուրքիայի գլխավոր շատբներում՝ ռազմական քարտեզներում և օպերատիվ պլաններում, չի իրագործվում: Կարծում եմ, որ նրանք նախատեսում էին շատ կարճ ժամանակում՝ գոնե մեկ շաբաթում գրավել խոշոր քաղաքներ Արցախում, և հուժկու հարձակումներով ակնկալում էին նոր բնագծեր հաստատել, բայց դա նրանց չի հաջողվել արձանագրել»,- ասաց ցեղասպանագետը:
Նրա խոսքով՝ Ալիևն իր անձի, ընտանիքի և իր կլանի հետագա գոյության հարցն է դնում այս պատերազմում:
«Այս պատերազմում պարտությունը կարող է թվով երրորդը լինել. առաջինը Ապրիլյանն էր, հետո Տավուշի իրադարձությունները, և այստեղ համեստ արդյունքները Ալիևի համար ցանկալի չեն: Նա ձգտում է ստանալ ամեն ինչ և միանգամից, այդ թվում և Արցախը: Ալիևը լայնամասշտաբ պատերազմ է սկսել համավարակի տարածման պայմաններում, քանի որ աշխարհը զբաղված է, և Ադրբեջանը կարող է ռազմական ճանապարհով լուծել Արցախի խնդիրը: Հարցն այստեղ հայկական կողմին բանակցությունների սեղանի շուրջ հրավիրելը չէ: Ալիևը վերջին 15 և ավելի տարիների ընթացքում գնել է մեծաքանակ զենքեր: Ասում են՝ եթե հրացանը պատից կախված է, այն մի օր կրակելու է: Նա հատել է այդ սահմանագիծը՝ շատ լավ հասկանալով, որ պատերազմը թանկ հաճույք է: Այս պահի դրությամբ՝ ադրբեջանական բանակի զբաղեցրած գծերը հետագա ծավալման առումով կարող են խոստումնալից լինել, բայց որպես հաղթանակ արձանագրելը ծիծաղելի կլինի: Ալիևը դեռևս ոչ մի զինվորականի չի պարգևատրել ինչ-որ գործողության համար, ինչը կարող էր քարոզչական մեծ հնարք լինել և ի ցույց դնել ադրբեջանական հասարակությանը, որ բանակը հաջողությունների է հասել: Պատերազմի 20-րդ օրվա դրությամբ՝ ադրբեջանական բանակը որևէ լուրջ տեղաշարժ, առաջընթաց ռազմական տեսանկյունից չունի»,- ասաց Դեմոյանը:
Ցեղասպանագետը հաղթանակի կամ պարտության գործում կարևորեց նաև եղանակային պայմանները՝ հիշեցնելով, որ շուտով անձրևների շրջանն է սկսվում, ինչի արդյունքում ավիացիան չի աշխատի, դրոնները չեն աշխատի, տանկային շարժուն զրահամեքենաները լեռնային պայմաններում հեշտությամբ կթիրախավորվեն, իսկ տեղանքին քաջածանոթ հայկական զինուժը կարող է բավական մեծ ու ծանր կորուստներ պատճառել ադրբեջանական բանակին:
Նա ընդգծեց, որ պատերազմը կարող է կտրուկ և շրջադարձային իրադարձությունների պատճառ դառնալ:
Ըստ Դեմոյանի՝ ադրբեջանական բանակի անհաջողության դեպքում ամբողջ մեղքը կբարդվի Ալիևի վրա, կարող է նաև հուժկու ներքին ընդվզում սկսել Ադրբեջանում՝ կրած կորուստների պատճառով, քանի որ Բաքուն գաղտնի է պահում կորուստների իրական թիվը:
Մանրամասները՝ տեսանյութում:
