Լավրովի նոր պլանը. Մոսկվան ցանկանում է Արցախում ռուս ռազմական դիտորդներ տեղակայել. ՏԵՍԱՆՅՈՒԹ

Ռուսաստանի արտաքին գործերի նախարար Սերգեյ Լավրովն այսօր կարծիք է հայտնել, թե հոկտեմբերի 10-ին Մոսկվայում Հայաստանի և Ադրբեջանի արտգործնախարարների համաձայնությամբ ձեռք բերված հրադադարի պայմանները կարող են կյանքի կոչվել, եթե ռուս ռազմական դիտորդներն ընդգրկվեն գործընթացում:

Հիշեցնենք՝ հրադադար հաստատվելու էր մարդասիրական նկատառումներով՝ ռազմագերիների փոխանակման և զոհվածների աճյունների դուրսբերման համար: Ու չնայած այս պայմանավորվածությանը, ադրբեջանական կողմը հրադադարի ռեժիմը խախտում է առաջին իսկ ժամերից:

Սերգեյ Լավրովը խոսել է նաև ղարաբաղյան հակամարտության քաղաքական լուծման մասին: Նա առաջ է քաշել տարածքների փուլային զիջման հայտնի տարբերակը, որին հաջորդելու է Արցախի կարգավիճակի քննարկման հարցը: Հակամարտության դադարեցման այս տարբերակին այսօր անդրադարձել է նաև վարչապետ Նիկոլ Փաշինյանը: Հայաստանի ղեկավարն անընդունելի է համարել տարածքների հանձնումը ոչ թե կարգավիճակի, այլ խաղաղության դիմաց:

«Օրբելի» կենտրոնի վերլուծաբան Կարեն Վերանյանը Լավրովի ասուլիսին հաջորդած Փաշինյանի ուղերձին անդրադառնալով, Factor.am-ի հետ զրույցում ասաց, որ վարչապետի ելույթի ժամանակ հնչեց միտք, որ հայկական կողմը տեր է կանգնելու Արցախի ինքնորոշման իրավունքին: Ըստ Վերանյանի՝ «պաշտոնական Երևանը դեմ է Լավրովի այն սցենարին, որ Արցախի կարգավիճակի հարցը պետք է քննարկել տարածքների վերադարձից հետո»:

Փորձագետը, անդրադառնալով Լավրովի այն պլանին, որ սկզբնական շրջանում, հրադադարի պայմանները պահպանելու համար, պետք է ընդգրկել ռուս դիտորդների, իսկ հետագայում նաև խաղաղապահների, նշեց, թե այսպիսով Ռուսաստանը ստեղծված իրավիճակից ելնելով իր շահերն է առաջ տանում:

Փորձագետը շեշտում է. առաջարկվող լուծումները չեն տալիս Արցախի բնակչության անվտանգության երկարատև և հստակ երաշխիքներ: Քաղաքագետ Հակոբ Բադալյանն էլ նշում է. «Լավրովն այսօր հասկացրեց, որ միայն ռուսական կողմը պետք է լինի դիտորդական առաքելություն իրականացնողը»: Սակայն այստեղ, ըստ վերլուծաբանի, անհրաժեշտ է ոչ թե Բաքվի, այլ Անկարայի համաձայնությունը:

Բադալյանն ասում է. Թուրքիայի ցանկությունն է Կովկասում լինել այնքան որոշող, որքան ՌԴ-ն, ինչի հետ Մոսկվան համաձայն չէ:

Ի դեպ, պաշտոնական Երևանը դեռ որևէ կերպ չի արձագանքել ռազմական դիտորդներ ներգրավելու տարբերակների շուրջ Լավրովի հայտարարությանը:

Մանրամասները՝ տեսանյութում։

Նարեկ Կիրակոսյան