Քաղաքականություն
10.10.2020 | 10:53Մեզ համար, իհարկե, առաջնային խնդիրն էր, որպեսզի մենք հասնեինք մի իրավիճակի, երբ կկարողանանք վերջ դնել այս ագրեսիային: Շուրջ 11 ժամ տևած բանակցություններից հետո այդ մասին ասել է ՀՀ Արտաքին գործերի նախարար Զոհրաբ Մնացականյանը՝ Հանրային հեռուստաընկերության «Լուրեր» լրատվականին տված հարցազրույցի ժամանակ՝ ներկայացնելով մանրամասներ Մոսկվայում Ադրբեջանի և Ռուսաստանի ԱԳ նախարարների հետ ունեցած բանակցություններից:
«Ագրեսիան այս պարագայում առանձնահատուկ էր, որովհետև Ադրբեջանի գործողությունները համալրված էին բավական բաց և ուժգին աջակցությամբ Թուրքիայի կողմից և միջազգային ահաբեկչական խմբավորումների ներգրավմամբ: Փաստորեն, մեր հայրենակիցները Լեռնային Ղարաբաղում կռվում էին բավական յուրահատուկ պայմաններում, երբ, բացի Ադրբեջանից կար նման ուժգին հարձակում՝ նման ուժերի ներգրավմամբ»,- ասել է ԱԳ նախարարը:
Մնացականյանը նշել է, որ բանակցությունները բավական բարդ են եղել և տարածաշրջանում իրավիճակը շարունակում է մնալ բավական փխրուն, անհրաժեշտ է հասնել կրակի դադարեցման:
«Բավական երկար բանակցությունների ընթացքում մենք կարողացանք արձանագրել այն է, մեզ անհրաժեշտ է դադարեցնել կրակը, դադարեցնել այս վայրագությունը, այս պատերազմը, ամրագրել, ամրապնդել այս դադարը և հետո նոր խոսել խաղաղ գործընթացի մասին և նաև վերահաստատել, որ Մինսկի խմբի համանախագահությունը մնում է այն միակ ձևաչափը, որը միջազգայնորեն ճանաչված հարթակն է բանակցությունների և խաղաղ գործընթացի համար։ Որևէ այլ ուժ, մասնավորապես՝ Թուրքիան, այդ առումով որևէ դերակատարություն չի կարող ունենալ: Առաջին խնդիրն այս ճգնաժամն ավարտին հասցնելն է»,- ավելացրել է ԱԳ նախարարը:
Մանրամասները՝ տեսանյութում:
