Այս պահին բանակցությունների մասին խոսելը ընդհանրապես անիմաստ է. Ռուբեն Ռուբինյան. ՏԵՍԱՆՅՈՒԹ

Ոչ մի տեխնիկական դետալ ֆիքսված չէ, չի բացառվում, որ որևէ բան տեղի չունենա և ռազմական գործողություները շարունակվեն, պետք է սպասենք: Այս մասին խորհրդարանում լրագրողների հետ զրույցում ասաց ԱԺ արտաքին հարաբերությունների հանձնաժողովի նախագահ Ռուբեն Ռուբինյանը՝ անդրադառնալով այսօր Մոսկվայում նախատեսված Հայաստանի և Ադրբեջանի ԱԳ նախարարների հանդիպմանը:

«Ադրբեջանա-թուրքատեռորիստական այս հարձակումից հետո աշխարհը պետք է, ի վերջո, սկսի մտածել Արցախի անկախությունը ճանաչելու մասին, քանի որ փորձը ցույց է տալիս, որ դա միակ ճանապարհն է՝ կայուն կերպով երաշխավորելու Արցախի ժողովրդի ֆիզիկական անվտանգությունը»,- ասաց նա՝ հավելելով, որ ԼՂ հակամարտության վերաբերյալ ընկալումներն էապես փոխվել են և մեծ դիվանագիտական աշխատանք կա անելու:

Ռուբեն Ռուբինյանը նշեց, որ Արցախի ճանաչումը թիվ մեկ հարցը պետք է դառնա օրակարգում:

«Հայկական կողմը հայտարարել է, որ Սիրիայից տեռորիստներ են տեղափոխվում Ադրբեջան Թուրքիայի կողմից, և ոչ միայն Ռուսաստանն է պաշտոնական մակարդակով ճանաչել այդ փաստը, այլ նաև Ֆրանսիան, Իրանը և այլ կազմակերպություններ ու երկրներ: Սա կարևոր է ֆիքսելու համար, որ Արցախը և Արցախի անվտանգության երաշխավոր Հայաստանը, ըստ էության, հակատեռորիստական պայքար են տանում»,- ասաց նա։

Ռուբինյանի խոսքով՝ այն, որ մեր գործընկերները, տարբեր կազմակերպություններ, լրատվամիջոցներ, պետություններ հակամարտության գոտում հաստատել են տեռորիստների առկայությունը, արդեն իսկ դրական տեղաշարժ է:

Պատգամավորը նշեց, որ ԵԱՀԿ Մինսկի խմբի համանախագահներն աշխատանք են տանում տարածաշրջանում կայունություն ապահովելու համար: Ինչ վերաբերում է Արցախը բանակցային կողմ լինելուն, նա ասաց, որ դա վաղուց է մեր պնդումը:

«Այս պահին բանակցությունների մասին խոսելն ընդհանրապես անիմաստ է։ Նախ պետք է դադարի պատերազմը, հետո, եթե լինի համապատասխան մթնոլորտ, գուցե կարելի է մտածել բանակցությունների մասին»,- ասաց նա:

Մանրամասները՝ տեսանյութում։