19.12.2025 | 13:05
ՀՖՖ-ն սկսել է տարվա լավագույն ֆուտբոլիստի և մարզիչի քվեարկությունը
Սոորոնբայ Ժեենբեկովը պատրաստ է հրաժարական տալ Ղրղզստանի նախագահի պաշտոնից
Քաղաքականություն
09.10.2020 | 13:51
Սոորոնբայ Ժեենբեկովը պատրաստ է հրաժարական տալ Ղրղզստանի նախագահի պաշտոնից՝ երկրում իրավիճակի կայունացումից հետո։ Այս մասին Ժեենբեկովը հայտարարել է քաղաքացիներին հղած ուղերձում, գրում է DW-ի ռուսական ծառայությունը։
Նա ասել է, որ անհրաժեշտ է անցկացնել նոր խորհրդարանական ընտրություններ ու ցրել կառավարությունը՝ հավելելով, որ այն բանից հետո, երբ գործադիր մարմնում կհաստատվեն լեգիտիմ ղեկավարներ, անձամբ կլքի երկրի ղեկավարի պաշտոնը։
«Ինձ համար ոչ մի պաշտոն ավելին չէ, քան երկրի ամբողջականությունը, ժողովրդի միասնականությունն ու հանրության հանգստությունը։ Մենք պետք է հնարավորինս շուտ ստեղծված իրավիճակը իրավական դաշտ վերադարձնել»,- նշել է երկրի գործող ղեկավարը։
Նշվում է, որ նոր կառավարություն նշանակելու համար անհրաժեշտ է ինչպես երկրի ղեկավարի, այնպես էլ խորհրդարանի որոշումները։
Ղրղզստանում քաղաքական ճգնաժամը սկսվեց հոկտեմբերի 4-ին։ Խորհրդարանական ընտրությունների արդյունքները երկրում զանգվածային բողոքի ակցիաների պատճառ դարձան։ Այս շաբաթ ցուցարարները ներխուժեցին խորհրդարանի շենք, ինչպես նաև քննչական մեկուսարանից ազատ արձակեցին նախկին նախագահ Ալմազբեկ Աթամբաևը։ Ավելի ուշ Ղրղզստանի ԿԸՀ-ն անվավեր ճանաչեց ընտրությունների արդյունքները։
