Չեն կարող հաջողության հասնել. Աղվան Վարդանյանը՝ «Ելք»-ի կողմից առաջադրված նախագահի թեկնածուի մասին

Ազգային ժողովի ՀՅԴ խմբակցության քարտուղար Աղվան Վարդանյանի խոսքով՝ մինչ այս պահը իրենց կուսակցության ներսում Հայաստանի Հանրապետության նախագահի հետ կապված որևէ քննարկում չի եղել: Այս մասին այսօր լրագրողների հետ զրույցում հայտնեց խմբակցության քարտուղարը: Այսօր, հիշեցնենք, «Ելք»-ը հայտնեց, որ նախագահի իրենց թեկնածուն լինելու է Արտակ Զեյնալյանը:

«Սահմանադրությունն ունի իր որոշակի պահանջները նախագահի ընտրության հետ կապված: Առաջին քվեարկության համար անհրաժեշտ է ձայների ¾-ը, այնուհետև աստիճանաբար իջնում է: Որքան հիշում եմ, «Ելք» դաշինքը նաև Ազգային ժողովի նախագահի թեկնածու էր առաջադրել, իրենց իրավունքն է: Ակնհայտ է, որ այդ նախաձեռնությունները չեն կարող հաջողության հասնել, բայց քաղաքական պայքար է՝ թող առաջադրեն»,- ասաց Վարդանյանը: ԱԺ ՀՅԴ խմբակցության քարտուղարը բացառեց Արտակ Զեյնալյանի թեկնածությունը պաշտպանելու հարցը:

«Եթե կա քաղաքական մեծամասնություն և կոալիցիոն համաձայնագիր, իսկ համաձայնագիրը գործում է առաջիկա հինգ տարիների համար, ապա միշտ վստահ եղեք, որ մենք կգտնենք համապատասխան թեկնածու, որը կբավարարի այդ պաշտոնում ներկայացվող պահանջներին ավելի, քան պարոն Զեյնալյանը»,- ընդգծեց ՀՅԴ-ական պատգամավորը:

Factor.am-ի դիտարկմանը, որ մամուլում որպես նախագահի թեկնածու շրջանառվում է արտաքին գործերի նախարար Էդվարդ Նալբանդյանի անունը, Աղվան Վարդանյանն արձագանքեց՝ որևէ անուն չի քննարկվել, սակայն Հայաստանում առնվազն 50 մարդ կա՝ վարչապետի պահանջներին համապատասխանող:

Մանրամասները՝ տեսանյութում:

Շողիկ Գալստյան